Wild in kollig op nuwe skou
Die wildbedryf kry op die Mpumalanga-skou ’n wonderlike kans om aan ’n wye gehoor te wys wat dit alles bied. Die skou word van 31 Augustus tot 3 September by die Mbombela-stadion in Nelspruit gehou.
Verskillende bedrywe sal in die kollig wees op die Mpumalangaskou – die eerste in sy soort in die provinsie. Veral toerisme, wild, die landbou en bosbou is onder die vergrootglas. Die wildbedryf in dié provinsie kry die kans om op ’n wildekspo uit te stal sonder om Mpumalanga se grens oor te steek.
Die skou is daarop gemik om maksimum blootstelling aan Mpumalanga te bied as ’n puik bestemming om SuidAfrika se dierelewe te ervaar.
“Mpumalanga het baie om te bied wat betref wildbesigtiging, bewaringsprojekte, jag en toerismebedrywighede wat relevant tot die wildbedryf is. Ons provinsie het baie om op trots te wees en ons gebruik hierdie geleentheid om daarmee te spog,” sê me. Lindi Botha, bemarkingsbestuurder van die Mpumalangaskou.
“Ons provinsie bied van weelderige, groen landskappe tot bosveld. Ons nasionale skat, die Krugerwildtuin met sy Vyf Grotes, het geen bekendstelling nodig nie en die oorvloed verblyf vir gaste op wildplase is ’n fees vir die sintuie. Geen wildliefhebber se wenslys is volledig sonder ’n uitgebreide besoek aan Mpumalanga nie.”
DIERELEWE
Lindi sê hulle is baie opgewonde oor die diere wat die Moholoholorehabilitasiesentrum vir wilde diere skou toe bring.
“Besoekers sal ’n jagluiperd van naby kan besigtig en die prag van hierdie dier kan ervaar. Ons is veral opgewonde om mense wat nog nooit naby so ’n dier was nie, die geleentheid te bied om dit te ervaar. Moholoholo bring ook ’n verskeidenheid roofvoëls na die skou toe.”
Die Krugerwildtuin staan ’n groot deel van sy uitstalruimte af aan wildprojekte binne die wildtuin, wat sal verseker dat toekomstige besoekers die diere kan waardeer.
Die komende groottandprojek moedig besoekers aan om foto’s en inligting te verskaf van enige dier met groot tande wat hulle in die Krugerwildtuin gesien het. Enige olifant met merkwaardige tande (meer as een meter lank) is van belang.
JAGTOERUSTING
Die provinsie is die tuiste van ’n groot aantal jaggeesdriftiges en bied ’n oorvloed jaggeleenthede. Gevolglik het die skou ’n toegewyde afdeling vir diegene wat die nuutste toerusting wil koop. Uitstallers sal gewere, ammunisie, messe, buitelugtoerusting en enige jagverwante artikels beskikbaar hê. Vir die yweriges wat hul skyfskietvaardighede wil opskerp, is daar boogskiet en skietkompetisies.
’n Spesiale uitstalling oor die vervaardiging van handgemaakte messe sal ook te sien wees. Besoekers sal kan sien hoe om messe te maak en ’n verskeidenheid pasgemaakte messe en mesvertoonkasse sal uitgestal word.
TEENSTROPING
Ter ondersteuning van wildbewaring sal belanghebbendes in die teenrenosterstropingsbedryf nuwe idees en uitvindsels op die skou uitstal wat hul saak kan bevorder.
Die teenstropingshondeeenheid en die Swart Mambas sal op die skou wees om die publiek bewus te maak van hul inisiatiewe. Besoekers kan ook uitsien na demonstrasies oor hoe robotvliegtuie in die stryd teen renosterstroping help.
Die Wildenomgewingsvereniging van SuidAfrika (Wessa) gaan tentoonstellings hê oor die doeltreffende projekte vir omgewings, ekotoerisme, opvoedings en jeugontwikkeling wat deur die hele SuidAfrika in werking gestel word. Leerders sal meer te wete kan kom van volhoubare ontwikkelingsprojekte en ’n kykie kry na moontlike loopbaangeleenthede binne Wessa.
EKONOMIE
“Hoewel die grootste belanghebbendes in Mpumalanga se ekonomie die landbou, mynbou, vervaardigings en boubedryf is, speel toerisme en die wildbedryf ’n groot rol. Talle mense word op die een of ander wyse deur toerisme en die wildbedryf geraak. Die ontwikkeling en volhoubaarheid van die wildbedryf verbeter vinnig. Dit is ’n groot verdiener van buitelandse valuta vir die provinsie – en ons gaan dit vier,” sê Lindi.
“Skoue soos hierdie is ’n groot hulpmiddel om sakeondernemings en geleenthede aan verbruikers en beleggers bekend te stel. Dit hou uiteindelik gunstige gevolge op lang termyn vir die ekonomie in.”
‘Besoekers sal ’n jagluiperd van naby kan besigtig en die prag van dié dier kan ervaar.’