Landbou móét Nasionale Ontwikkelingsplan toepas
Die Nasionale Ontwikkelingsplan en die uitvoering daarvan is nie net die Regering se verantwoordelikheid nie. Dit is almal in Suid-Afrika, ook die landboubedryf, se plan en boere se bydrae daartoe behoort meer gewig te dra as dié van die Regering.
Die volgende ses maande kan vir die geskiedenis van die Suid-Afrikaanse bevolking én vir die landbou ’n waterskeidingstydperk wees.
Kredietagentskappe let op beleidsekerheid en ekonomiese groei. Deur middel van kredietgraderings gee hulle dan hul siening of Suid-Afrika ’n rooskleurige beleggingsbestemming gaan bly of nie.
Een van die maatstawwe waaraan die toepassing van regeringsbeleid gemeet kan word, is in watter mate hoofstuk 6 van die Nasionale Ontwikkelingsplan (NOP) suksesvol en ondubbelsinnig deur die Regering toegepas word.
’n Aspek waarop gelet moet word, is dat die NOP vir die totale bevolking van Suid-Afrika geskryf is en nie net vir die Regering nie. Die aktiewe deelname van die publiek en aksies van gewone burgers en boere om die doelwitte van die NOP uit te voer, speel ’n belangriker rol as die Regering.
Dink so daaroor. Die NOP is ook jóú plan en jou bydrae behoort meer gewig te dra as die toepassing van beleid wat deur die Regering of landbouleiers gedoen word.
Die NOP is grotendeels deur benoemde kundiges uit die private sektor ontwikkel en dit is deur die regerende party as regeringsbeleid aanvaar. Sommige sosialiste in Suid-Afrika ondersteun nie die plan ten volle nie en dit is juis daarom dat van regeringsbeleid afgewyk word.
BOERDERYDOELWITTE
Jy kan nie apaties teenoor die uitvoering van die NOP staan nie. Jou bydrae is belangrik om te verseker dat die plan toegepas word en slaag. Jy en ander nie-regeringsorganisasies hoef nie op die Regering te wag om regeringsbeleid deel te maak van jou boerderydoelwitte en om ’n aktiewe bydrae te lewer nie.
Die NOP se primêre doel is om ekonomiese groei, voedselsekerheid en werkskepping aan te wakker.
Eerstens moet onthou word die NOP is as ’n beleidsdokument deur die Regering aanvaar.
Tweedens hanteer dit die belangrikheid van voedselsekerheid en die groot bydrae wat die landbou tot nasionale voedselsekerheid lewer.
Suid-Afrika lewer van die goedkoopste voedsel ter wêreld omdat die land ’n netto uitvoerder van landbou- en voedselprodukte is. Daarsonder sou die invoer van voedsel- en landboukommoditeite hoofsaaklik teen invoerpariteit moes wees. Dit sou tot ’n tipe Arabiese Lente in Suid-Afrika lei met opstande en betogings.
Die land se handelsbalans vir die landbou moet dus deurlopend positief bly – uitvoer moet invoer oorskry. Só word voedselsekerheid verseker. Dit word gedefinieer as bekostigbare, toeganklike en veilige voedsel.
Die Bankvereniging van Suid-Afrika en die landbousakekamer Agbiz se voorstelle rakende grondhervorming, wat die herverdeling van grond en restitusie insluit, is op die NOP, dus op aanvaarde regeringsbeleid, gegrond.
Ten opsigte van die landbou moet die regeringsbeleid geskoei wees op die uitvoering van die NOP. Praat dus ook met jou personeel daaroor. Dit is ook ’n opvoedingstaak om te verseker môre se jeug sal voedsel op die tafel hê danksy nuwe werksgeleenthede wat geskep is, en dat almal sal verstaan waarna gestreef word.
VOETSOOLVLAK
Die oogmerk van die plan is dat landelike gemeenskappe se lewenstandaard teen 2030 sal verhoog. Dit sal uiteindelik realiseer as die sosiaal-politiese en ekonomiese omstandighede in Suid-Afrika merkbaar verbeter.
Gunstige omstandighede lei tot geleenthede vir ekonomiese groei, wat weer beteken die behoefte aan werkers met spesifieke vaardighede en vermoëns neem toe. ’n Toename in ekonomiese groei lei verder tot ’n daling in armoede en werkloosheid, en derhalwe verhoog almal in Suid-Afrika se lewenstandaard.
Dit is belangrik dat sterk leiers uit plaaslike gemeenskappe as landbouleiers ontwikkel.
Doeltreffende regering is belangrik. Let egter op dat die aktiewe deelname van die landbougemeenskap die grootste gewig of vereiste bo dié van landbouleierskap en die rol van die Regering moet wees. Dít is waar ekonomiese groei gebeur, op voetsoolvlak by produsente op hul plase.
GEVOLGTREKKING
Die NOP is vir elke Suid-Afrikaanse burger geskryf en almal moet toesien dat dit as sodanig uitgevoer word. Elkeen moet toesien dat sy medeburgers in sy boerdery en bedrywe bewus is van die plan. Almal moet hulself daartoe verbind om in pligsbesef die plan aktief en sonder oponthoud toe te pas.
Luidens mediaberigte is drie direkteure-generaal geskors by drie verskillende regeringsdepartemente, wat al drie ’n kritieke rol in die landbou speel. Een is weens beweerde korrupsie geskors en twee omdat hulle glo hulle juis nie daaraan skuldig wou maak nie.
Dit laat ernstige vrae ontstaan oor die verbintenis van die openbare sektor tot die suksesvolle uitvoering van die NOP, wat reeds in 2013 aanvaar is.
Om ’n volhoubare toekoms vir almal in Suid-Afrika te skep, moet alle burgers ’n gesamentlike visie hê waarvolgens hulle kan optree. Die NOP skep daardie gesamentlike visie vir inklusiewe groei.
Mnr. Wessel Lemmer (foto) is ’n senior ekonoom by Absa-Agribesigheid. Dr. John Purchase is die uitvoerende hoof van Agbiz.
Dink so daaroor. Die Nasionale Ontwikkelingsplan is ook jóú plan en jou bydrae behoort meer gewig te dra as dié van die Regering of landbouleiers.