ONAFHANKLIKE RASSE OOK AAN DIE WOEKER
Suid-Afrika se telersgenootskappe vir Brahmane, Simmentalers, Simbras en Brangusse is ook hard aan die werk om hul teelwaardes genomies te verryk.
Mnr. Thys Meyer verteenwoordig die genootskappe wat self as registrasie-owerhede in die nasionale vleisbees-genomikaprogram optree. Hy het die Bonsmaragenootskap geluk gewens met sy genomiesverrykte teelwaardes, veral omdat die betrokke telers bereid was om hul hande in hul sakke te steek om self ’n bydrae te lewer.
Thys sê die genootskappe wat self as registrasie-owerhede optree, het al ’n aantal kuddes binne elke ras betrek wat bereid was om die volledige byhou van aantekeninge van alle meetbare eienskappe te doen. Dit
sluit in geboortegewig, groei, vrugbaarheid, karkas, netto voerinname, vleisgehalte en ’n genomiese databasis. Die betrokke rasse het veral moeilik meetbare eienskappe beklemtoon om sogenoemde kernkuddes te skep.
Hierdie eienskappe sluit in vleissagtheid, voeromsettingsdoeltreffendheid, soos wat in ’n GrowSafe-stasie of die ou fase C-stasies gemeet is, asook reproduksieeienskappe, soos aantal dae tot kalftyd.
KI-bulle is binne elke ras benoem, vir party rasse nasionaal en vir ander internasionaal, om oor kuddes en lande heen sterk koppelings te bewerkstellig.
Vir die plaaslike Brahmanras beteken dit byvoorbeeld dat Australië en Amerika in sy genomikaprojek ingesluit kan word en dié lande se genomiese verwysingskuddes dus ook gebruik kan word.
Australiese Brahmantelers het byvoorbeeld sowat 10 000 snyweerstand-metings (om vleissagtheid te bepaal) en genotipes, sê Thys.
“Die ideaal met genomika is om die teelwaardes vir ekonomies belangrike eienskappe te verryk, soos voerdoeltreffendheid en vleissagtheid, wat duur is om te meet. Dit is ook waar die grootste bydrae gesien word.
“Deur internasionaal saam te werk, word toegang tot baie meer data verkry, en die verwysingskudde vir geno-én fenotipes word baie groter gemaak. Die onmiddellike oorwinning vir telers is volledig kontemporêre groepe wat in groot getalle bewerkstellig word, met eie én KI-bulle, wat die akkuraatheid en gehalte van die teelwaardes verhoog.”