Koring: ‘Pasop vir kommandowurm’

DIE DEPARTEMENT van Landbou, Bosbou en Visserye, Graan SA en die SA Nasionale Saadorganisasie (Sansor) beskou berigte wat hulle oor Amerikaanse kommandowurm by koring uit Zimbabwe ontvang, in ’n baie ernstige lig.

“Dit is nog nie amptelik bevestig nie en dit is nog redelik koud in die Kaap, maar ons kan nie te versigtig wees nie,” sê mnr. Jan Hendrik Venter, bestuurder van vroeëwaarskuwingstelsels vir plantgesondheid by die Departement van Landbou, Bosbou en Visserye.

Die departement, Graan SA en Sansor werk aan ’n waar- nemingsprojek vir Amerikaanse kommandowurm in die koringgebiede van die Wes-Kaap.

Intussen beveel Venter aan dat boere die inligtingstukke op die departement van landbou se webblad www.daff.gov.za lees en hul gesaaides dophou. “Dit is moeilik. Ons het in Suid-Afrika nie ’n konsep om van te werk nie.

“Boere kan kyk vir eierpakkies, maar ons weet nog nie of die wurms op koring gaan eiers lê nie. Die beste is om te kyk vir eierpakkies en klein wurmpies wat begin uitbroei.

“Dit is baie basiese voorsorg, maar ons kan nie heeltemal houtgerus wees nie.”

Boere wat iets verdags in hul koringlande sien, kan Venter bel by tel. 012 319 6384.

STRATEGIE

’n Gekoördineerde strategie om skade van die herfskommandowurm in Suider-Afrika voor die volgende planttyd te probeer verminder, is intussen onder leiding van die Verenigde Nasies se Voedsel- en Landbou-organisasie (VLO) ontwikkel.

Mnr. David Phiri, koördineerder vir die VLO in Suider-Afrika, sê die strategie sluit in waarnemings en die aanmelding van die plaag, opnames oor die skade wat dit veroorsaak en volhoubare bestuur en die bestryding daarvan. “Die grootste probleem lê nou by die volgende planttyd. Ons het nog nie die regte plaagdoder waarmee dit bestry kan word nie en dit is ’n wedloop teen tyd.”

Daar is vroeër met kundiges van Latyns-Amerikaanse lande vergader om te kyk of hul bestrydingsmetodes in Afrika toegepas kan word.

Brasilië bestee sowat $600 miljoen (R7,8 miljard) per jaar om die plaag te bestry. Ramings van die Internasionale Sentrum vir Landbou- en Biowetenskappe dui daarop dat 13,5 miljoen ton mielies van $3 miljard (R39 miljard) in Afrika in die komende seisoen verlore kan gaan weens die wurms. Die totale risiko onder die meer as 80 plantsoorte waarop die wurms in Afrika voed, is $13,3 miljard (R172 miljard).

‘Die beste is om te kyk vir eierpakkies en klein wurmpies wat begin uitbroei.’