Dié week in die landbou
JAPIE GROBLER
Mnr. Japie Grobler, voormalige hoof van Nampo en Agri SA, is ernstig beseer in ’n motorongeluk op die R30 tussen Orkney en Bothaville in die Vrystaat. Sy dogter, me. Carlien van Huyssteen, het kort voor druktyd aan Landbouweekblad gesê hy is in ’n stabiele toestand in die Wilmed-hospitaal in Klerksdorp. Grobler se heup is vergruis en hy het ernstige beenbreuke opgedoen, maar Van Huyssteen sê hy reageer goed op behandeling. Die bestuurder van die ander voertuig is in die ongeluk dood.
BOEWE SOEK VLEIS DIE GHWARRIES IS GAAR
Namate die knellende droogte in die winterreëngebiede boere ál harder ry, is verdorde landerye en leë damme nie meer ’n ongewone gesig nie. Iets wat mnr. Gert Lerm (62) van die plaas Warmwater naby die Calitzdorp-spa egter in sy 62 jaar op aarde nog nooit gesien het nie, is ’n droogte wat so straf is dat selfs die geharde ghwarriebome wat die hele Klein-Karoo vol staan, begin vrek. Hy verwag dat ’n paar honderd bome teen September daarmee heen gaan wees. Hy het einde verlede jaar agtergekom die bome begin verkleur. Teen Maart was hulle erg vaal, en teen Mei was hulle morsdood. “Ons het al droogte ervaar, maar hierdie is ’n ongekende droogte,” sê hy. gevalle die afgelope twee maande waar vragmotors van die pad gedwing en die vleis gesteel is. Die voertuie is langs die pad gelaat. Volgens mnr. Elton Gross, bemarkingsbestuurder van Volksrust Meatco, wat twee besendings vleis verloor het, moet dié diewe vleiskenners wees met ’n voorafbepaalde afsetpunt. “Dis ’n vragmotor van 12 ton of 14 ton, volgelaai met voor- en agterkwarte. Dis ’n kuns om net die kwarte af te laai.”
PAPPERKE
Suid-Afrika se program om perke op die vrystelling van kweekhuisgasse in te stel maak nog nie hond haaraf nie, blyk uit ’n ontleding wat die sakekamer Agbiz gedoen het oor die gidsfase van dié program. In die eerste fase van dié program, wat strek tot 2020, is perke op die vrystelling van kweekhuisgasse vrywillig. Sommige maatskappye is gevra om deel te neem aan ’n gidsprojek vir die vermindering van kweekhuisgasse in ruil vir belastingaansporings. Suid-Afrika neem deel aan die Verenigde Nasies se raamwerkkonvensie oor klimaatsverandering. Deelnemers is onderhewig aan ’n “koolstof-begroting” wat bepaal hoeveel skadelike gasse ’n land oor ’n tydperk mag vrystel.
VAT50
’n Beesboer van Botswana het ’n Suid-Afrikaanse rekordprys betaal vir ’n swart Angusbul op die veiling waarmee die 50ste bestaansjaar van die Angusstoetery Mequatling by Clocolan gevier is. Mnr. Monty Chiepe, eienaar van ’n KI-en-embrio-onderneming in Gaborone, het R140 000 betaal vir Mequatling Smokin’ Jo
(onder), seun van HF Kodiak 5R, wie se semen van Hamilton Farms in Noord-Amerika ingevoer is. Bulle is op die veiling vir gemiddeld R61 000 verkoop, en koeie vir gemiddeld R31 000. Lees die volledige veilingsverslag op bl. 91.
SITRUS-PERESTROIKA
Die Russiese owerhede het gehoor gegee aan Suid-Afrikaanse pleidooie om vereistes vir individuele plakkers op kartonhouers invoersitrus na dié land te verslap. Dit is baie tydrowend om die plakkers aan te bring. Mnr. Justin Chadwick, uitvoerende hoof van die Sitruskwekersvereniging, het aan FreshPlaza gesê die reëling is dat daar op elke palet sitrus ’n koevert aangebring sal word, wat ’n plakker vir elke kartonhouer in die palet bevat. Elke plakker moet kragtens dié vereiste van die Euro-Asiatiese Ekonomiese Kommissie die name aandui van die produk, produsent, uitvoerder en invoerder, asook die produk se lewensduur. Die logo van die kommissie moet ook daarop wees.
OPSKUD VIR BULGARYE
Boere wat belang stel om vanaf 23 September tot 2 Oktober die TLU SA se inligtingstoer na Bulgarye mee te maak om boerdery- en beleggingsgeleenthede in dié Oos-Europese land te ondersoek, moet teen 23 Augustus inskryf. Die toer is saamgestel nadat die belangrikheid van ’n verskeidenheid beleggings vir entrepreneurs, veral boere, op die TLU SA, Old Mutual en Agri All Africa se onlangse verskansingseminare beklemtoon is. Die TLU SA is reeds geruime tyd in gesprek met die Bulgaarse regering oor geleenthede vir Suid-Afrikaanse boere. ’n Visum is nodig om saam te reis. Vir nog besonderhede en inskryfvorms, kontak bennievz@ gmail.com. Vorms is ook op Landbou.com beskikbaar.