Afleggings, hofsake ry Agri Mega
TEN SPYTE van ’n bedrogsaak teen mnr. Orton King (foto), uitvoerende direkteur van die Megagroep, ’n siviele saak teen Agri Mega en grootskaalse afleggings by dié maatskappy, is alles glo op koers vir die 25ste Agri Megaweek om in September op Bre- dasdorp gehou te word.
King is in Mei in hegtenis geneem ná ’n lid van Agri Mega se direksie ’n klag van bedrog van R2,3 miljoen aanhangig gemaak het. Dit is intussen verander na ’n klag van sekondêre diefstal.
Mnr. Alan Winde, minister van ekonomiese geleenthede in die Wes-Kaap, het ook bevestig dat die provinsiale departement van landbou ’n siviele saak teen Agri Mega NPC (’n onderneming sonder winsoogmerk) gemaak het op grond van kontraktuele oortredings.
Na verneem word, hou dit verband met die beweerde wanaanwending van sowat R30 miljoen staatsgeld wat vir die ontwikkeling van nuwe boere bestem was. Winde sê die geld is in 2014 oorbetaal.
AFLEGGINGS
Landbouweekblad het ook verneem altesame 24 werknemers van die Mega-groep is afgelê. Vrydag 28 Julie was hul laaste werkdag. Verskeie ondernemings het glo die afgelope tyd hul ondersteuning aan Agri Mega onttrek.
King het op Dinsdag 25 Julie weer in die landdroshof op Bredasdorp op die klag van sekondêre diefstal verskyn. Die saak is tot 10 Oktober uitgestel sodat die direkteur van openbare vervolging kan besluit of verdere vervolging moet plaasvind, het me. Corlene Conradie van Besters Prokureurs gesê. King se borgtog is vir dié tyd verleng. “Die rede waarom die klag na sekondêre diefstal verander is, is vir ons duister,” het sy aan Landbouweekblad gesê.
Me. Felicity Pereu kla aan.
NIKS IN DIE PAD
Mnr. Jan Greyling, bestuurder van media en sake-ontwikkeling by die Mega-groep, het die versekering gegee dat die Megaweek sal voortgaan.
“Tans is daar niks wat in die Megaweek se pad staan nie. Die besprekings van uitstallers loop mooi, asook die openingsprekers en mense wat aktiwiteite gaan aanbied.”
Mnr. Pikkie Louw, projekbestuurder by die Mega-groep, behartig die reëlings vir vanjaar se Megaweek. King is steeds op sy pos by die onderneming.
ONSKULDIG
King het in ’n verklaring gesê hy is oortuig van sy onskuld en begerig dat die reg sy loop neem.
“Hierdie aangeleentheid in ons eie geledere (sal) hoegenaamd geen invloed op enige van ons projekte hê nie. Ek, my personeel en ons medewerkers gaan volstoom voort om aan ons kliënte die beste moontlike diens en produkte te lewer.”
Vanjaar se ekspo vind vanaf 13 tot 16 September plaas. Die klem is oudergewoonte op boere, verskaffers en verbruikers van landbouprodukte, maar die tema gaan ook toerisme en die buitelewe aanraak.
‘Die rede waarom die klag na sekondêre diefstal verander is, is vir ons duister.’