WES-KAAP TAKEL AVO-MARK

KENNERS meen daar lê groot geleentheid voor vir avokadouitbreiding in die WesKaap, en voornemende beleggers begin reeds skarrel om van hierdie geleentheid gebruik te maak.

Nagenoeg 20 voornemende avokadoboere het einde Julie na Allesbeste Boerdery by Tzaneen opgetrek om inligting oor die bedryf, jong boompies en ’n verhouding met die uitvoermaatskappy Afropro te bekom.

Volgens dr. André Ernst, die uitvoerende hoof van die familiebesigheid Allesbeste, was dit ’n baie suksesvolle geleentheid.

“George in die WesKaap is na ons mening die belangrikste groeipunt vir avokado’s in die WesKaap. Ons is opgewonde oor die moontlike uitbreiding, want die tydgleuf waarin boere in George die produk kan lewer, is later as hier in die noorde, wanneer die vraag na ’n gehalteproduk op die plaaslike én uitvoermark die voorsiening oorskry. Die prys in hierdie tydgleuf, van September tot Desember, sal dus baie gunstig wees,” verduidelik Ernst.

UITBREIDING

Die bekende Moolmanfamilie, wat onder meer die Caxtonmediamaatskappy besit, het dié inligtingsessie gereël. Hulle besit reeds 25 ha avokado’s in die Georgeomgewing en wil oor die volgende vyf jaar ’n verdere 75 ha vestig. Dr. Guy Witney, die bestuurder van hul avokadoprojek, meen die geleenthede van avokado’s in die WesKaap is groter as wat besef word.

“Aanvanklik was verwag dat die produksie per hektaar in hierdie streek dieselfde sal wees as in die noorde van die land – ongeveer 10 ton/ha tot 12 ton/ha. Ons mik egter vir 17 ton/ha, want dit is duidelik dat hierdie opbrengs en selfs soveel as 22 ton/ha moontlik is. En omdat ons aan die einde van die noorde se seisoen kan lewer, sal ons tot ’n 30%premie op produkte van goeie gehalte kan verdien,” sê hy.