NWK TOON ’N WINS ONDANKS DROOGTE
ONDANKS die laagste graanontvangste in amper 15 jaar het die landboumaatskappy NWK, met sy hoofkantoor op Lichtenburg en midde-in die somersaaistreek wat die hardste deur die afgelope rekorddroogte getref is, steeds ’n nabelaste wins van R52 miljoen behaal vir die boekjaar tot 30 April.
Die groep sê hy het die afgelope seisoen net 300 000 ton mielies en 39 000 ton sonneblomme ontvang, teenoor die vorige jaar se 559 000 ton mielies en 87 000 ton sonneblomme.
Hy benadruk dat die jongste resultaat nie NWK se werklike potensiaal weerspieël nie, en dat ’n goeie reënjaar sal verseker dat hy weer tot sy reg kom.
Die groep moes in die afgelope jaar ’n bykomende R11 miljoen op sy bates in ondernemings in die res van Afrika afskryf, asook R20 miljoen op klandisiewaarde van beleggings in Zambië en Botswana.
KONTANTVLOEI
Uit bedryfsaktiwiteite is nogtans ’n positiewe kontantvloei van R516 miljoen behaal danksy die bedryfswins van voortgesette bedrywighede, ’n wesenlike afname in die graanvoorraad wat gedra word, en die afbestuur van handelsvoorraad en grondstowwe.
Die positiewe kontantvloei is wel ietwat gestrem deur hoër vlakke van lenings en debiteure weens die droogte.
Mnr. Heinrich Krüger, voorsitter, sê NWK se winsgewendheid is nie op die vlak waar hulle dit wil hê nie, maar hy is oortuig dat die draaipunt reeds bereik is.
Ten spyte van die lae ontvangste het die graanafdeling ’n positiewe resultaat van R81 miljoen behaal. Kleinhandel het in die uiters swak landboujaar uitstekend gepresteer en R66 miljoen tot die voorbelaste wins bygedra. Die departement vir tesourie en finansiering se wins was R61 miljoen, en die Certisureversekeringsarm het R4 miljoen wins bygedra.
Die Noordfed-meule, wat in die proses is om verkoop te word, se voorbelaste verlies was R46 miljoen.
KONSOLIDASIE
Die Epko-parsaanleg, wat in 2015 deur ’n brand vernietig is en gevolglik ’n inkomste uit versekering gekry het, het R58 miljoen tot die groep se voorbelaste wins bygedra.
Opti Feeds se volumes en marges is steeds nie na wens nie en hy het ’n voorbelaste verlies van R13 miljoen gely. Opti Chicks se voorbelaste wins was R11 miljoen, wat goed met dié van mededingers vergelyk. Die konsolidasie van dié twee besighede word nou beoog.
Die direksie het ’n jaareinddividend van 3c per aandeel goedgekeur, wat ná belasting 2,4c verteenwoordig.