Voëlgriep by wilde voëls gekry
DIESELFDE stam van die hoogs aansteeklike voëlgriep wat sedert Junie op vier kommersiële Suid-Afrikaanse hoenderplase uitgebreek het, is nou ook in wilde voëls in die land gevind.
Volgens die internasionale organisasie vir dieregesondheid (OIE) se voëlgriepwebblad het Suid-Afrika nege vrektes weens die H5N8-stam onder geelbekeend e, kolgans een swartkeelgeelvink e aangemeld.
Dit was in die munisipale gebiede van Lekwa (Standerton) in Mpumalanga en van Tshwane (Pretoria) en Emfuleni (Vanderbijlpark) in Gauteng.
Volgens prof. Celia Abolnik, hoof van pluimvee gesondheid aan die Universiteit van Pretoria, is dit die eerste keer dat dié stam onder wilde voëls in Suider-Afrika gevind word.
“Dit dui moontlik daarop dat die virus ná ’n uitbreking in Januarie in Uganda deur watervoëls oorgedra is, wat nie noodwendig trekvoëls is nie,” sê sy.
RISIKO
Dr. Ziyanda Majokweni, direkteur van die Bestuursagentskap vir Pluimveesiektes (PDMA), sê die feit dat die stam by wilde voëls gevind is, verhoog die risiko’s vir die kommersiële bedryf, omdat wilde voëls as “’n reservoir” kan dien.
Volgens mnr. Kevin Lovell, hoof van die Suid-Afrikaanse Pluimveevereniging (SAPV), vereis die OIE dat hoogs aansteeklik voëlgriep onder wilde voëls aangemeld word, maar die bedoeling is nie dat dit tot handelsbeperking lei nie.
Sulke voëls word nie doodgemaak nie.
Volgens Lovell is die Departement van Landbou, Bosbou en Visserye besig om die beste
manier van waarneming onder wilde voëls in hoërisikogebiede te bepaal. Dit behels die neem van voëlmismonsters. Beperkte waarneming vind reeds plaas, sê Lovell.
Volgens ’n berig op die Mosambiekse mediawebwerf O País het die buurland se verbod op die invoer van hoenders uit Suid-Afrika, Zimbabwe en die Demokratiese Republiek van die Kongo die Mosambiekse spysenieringsbedryf geknou.
KFC het byvoorbeeld sy getal daaglikse maaltye halveer.
’n Woordvoerder vir KFC het gesê plaaslike produsente kan nie die gehalte en hoeveelheid waarborg wat KFC nodig het nie, maar dat die onderneming weens die krisis twee ton plaaslike hoenderstukke op ’n proefgrondslag gaan koop.
‘Plaaslike produsente kan nie die gehalte en hoeveelheid waarborg wat KFC nodig het nie.’