JOU PLAAS IS VEILIG

SUID-AFRIKA is onlangs in die 26ste plek uit 127 lande geplaas in ’n wêreldwye beoordeling van lande se beskerming van eiendomsregte in daardie lande.

Die uitslag van vanjaar se Internasionale Eiendomsreg-indeks (IPRI) is in Julie in Buenos Aires bekend gemaak. Dié opname het 98% van die wêreld se bruto binnelandse produk (BBP) en 93% van die wêreldbevolking betrek. Die enigste lande wat uitgesluit is, is lande waaroor nie voldoende inligting beskikbaar was nie (waarvan Swaziland een was).

Dr. Sary Levy-Carciente, ’n ekonoom van Venezuela en die hoofsamesteller van die indeks namens die Eiendomsregte-alliansie (PRA), sê die indeks is ’n barometer om die status van eiendomsreg wêreldwyd te meet.

Dit bestaan uit drie onderafdelings: Die wetlike en politieke omgewing (LP) in ’n land, die stand van fisieke eindomsregte (PPR) en intellektuele eiendomsreg (IPR). Ván die aspekte waarna spesifiek gekyk word, sluit in die onafhanklikheid van die regbank, politieke stabiliteit, die bekamping van korrupsie, die registrasie van eiendom, beskikbaarheid van lenings, die beskerming van patente en die skending van outeursreg.

BIETJIE BETER

Vanjaar se wêreldgemiddelde was 5,63 uit 10 vir die oorhoofse indeks. Dit was 0,19 hoër as verlede jaar. Die politieke en wetlike omgewing het, soos ook in die vorige twee jaar, die slegste gevaar met ’n telling van 5,17, gevolg deur intellektuele eiendomsreg met 5,55 en fisieke eiendomsreg met 6,22.

Suid-Afrika se oorhoofse telling was 7,00. Vir die politieke en wetlike omgewing was dit 5,71, vir intellektuele eiendomsreg 7,45 en vir fisieke eiendomsreg 7,83.

Wat wetlike sekerheid betref, was Suid-Afrika 47ste geplaas; 19de vir sekerheid van fisieke eiendomsreg; en 26ste vir sekerheid van intellektuele eiendom.

Die lande in die swakste posisie was Jemen, Venezuela, Bolivia, Bangladesj en Moldowa.

Besoek Landbou.com vir die volledige lys en die oorspronklike verslag.

Wat dink jy hiervan? WhatsApp ons by sel 063 720 3632.