STELLENBOSCH SE SAKESKOOL SLYP OOS-KAAPSE BOERE
KLEIN en mediumgroot ondernemings, soos boerderye, misluk dikwels al in hul eerste jaar weens swak marknavorsing, ’n gebrek aan sakekennis en die onvermoë om ’n sakeplan saam te stel.
Só sê dr. Marietjie TheronWepener, hoof van die Universiteit Stellenbosch Bestuurskool (USB) se kleinsake-akademie (SBA).
Die USB het onlangs die SBA-program, wat al vier jaar lank suksesvol in die WesKaap bedryf word, ook na die Oos-Kaapse platteland uitgebrei. “Dit het die broodnodige tekort aan sake-onderrig oorbrug en klein ondernemings bemagtig en versterk,” sê Theron-Wepener.
Die nege maande lange pro- gram sluit onder meer sake-administrasie, finansiële bestuur en bemarking in. Studente word ook geleer hoe om ’n sakeplan op te stel.
Meer as 35% van die OosKaapse bevolking is werkloos, sê mnr. Ayanda Gqoboka, hoofuitvoerende beampte van die Joe Gqabi- ekonomiese ontwikkelingsagentskap (JoGEDA).
“Sonder voortgesette betekenisvolle belegging en sake-inligtingsplatforms word die distrik benadeel deur die toenemende migrasie van mense wat op soek is na werkgeleenthede in naburige stede en metropolitaanse gebiede.”
Dít is waarom dit noodsaaklik is om die eienaars van klein, mediumgroot en mikro-ondernemings se sakekennis te verbeter.
FYNER BESTUUR
Mnr. Tansanqa Mkumantela van Maclear huur 2 ha grond by die Elundini-munisipaliteit waarop hy met varke boer wat hy aan plaaslike slagters, straatverkopers, restaurante en huishoudings verkoop.
Hy was onder die eerste groep kleinsake-eienaars wat die kursus vandeesmaand voltooi het. Hy sê hy sou nooit andersins die bestuurs- en sakevaardighede aangeleer het wat hy deur die kursus bekom het nie.
“Die program het my geleer om fyner te bestuur. Ek het noodsaaklike sakekennis aangeleer, soos die belangrikheid van afsonderlike rekeninge vir persoonlike en sakegebruik, hoe om ’n sakeplan op te stel en om die verskil tussen advertensies en bemarking te verstaan.”
Mnr. Lawrence Maduna, ’n veeboer wat sewe mense heeltyds en 10 mense deeltyds in diens neem, boer op 771 ha naby Lady Grey. Danksy die program is hy nou rekenaargeletterd. Die rekenkundige en finansiële kennis stel hom ook in staat om nou saam met sy boekhouer te werk.
Die SBA-ontwikkelingsprogram word deur JoGEDA, die Oos-Kaapse Ontwikkelingskorporasie, die provinsiale departement van ekonomiese ontwikkeling, omgewingsake en toerisme en die USB geborg. Besoek die webwerf www.usb.
ac.za/sba/apply/wc of kontak mnr. Benjamin Matshoba by tel.
021 918 4379 vir nog inligting of om vir die kursus in te skryf.