Diere se rol op konferensie bekyk
“BEWARINGSLANDBOU in ’n gemengde boerdery” is vanjaar die tema van die KwaZulu-Natalse geenbewerkingklub se jaarlikse bewaringslandboukonferensie buite Bergville.
Die konferensie word oudergewoonte by die Drakensville-oord gehou, vanjaar van 5-7 September. Verskeie vooraanstaande sprekers gaan by dié geleentheid praat.
Dr. Warren Parker, voorsitter van Nieu-Seeland se bewaringsowerheid en vroeër uitvoerende hoof van dié land se navorsingsinstituut vir bosbou, is die genooide spreker uit die buiteland. Hy is ook lewenslange lid van die SA Large Herds-vereniging, wat hy al telkens toegespreek het. Hy het ook poste aan die Universiteit van Queensland, die Crown-instituut vir landbounavorsing en die Massey-universiteit beklee. Nog ’n spreker is dr. Neil
Miles, senior grondwetenskaplike by die SA Suikervereniging, wat ook jare lank by die Landboukollege Cedara gewerk het om ’n grondontledingsprogram te ontwikkel waarop baie Suid-Afrikaanse boere staatmaak. Mnr. Steve Colenbrander ,’n geoktrooieerde rekenmeester met baie boere as kliënte, sal konferensiegangers oor die finansiële sy toespreek. Onder die boeresprekers is mnre. Wolfgang Loepers, wat in die Wes-Kaap met olywe en wyn boer, en Egon Zünckel , wat by Bergville en Warden met hoofsaaklik mielies en sojabone boer. Hy plant ook dekgewasse en bedryf ’n beesboerdery. Ook op die sprekerslys is mnr.
Angus McIntosh, ’n jong boer van Stellenbosch met vernuwende idees oor die gebruik van verskillende weidingsgewasse en lewende hawe om ’n verdroogde plaas wat hy sewe jaar gelede gekoop het, te herstel. Hy bemark eiers, beesvleis, lammers en varke wat op die weidings wei.
Aan die akademiese kant sal prof. Johnnie van den Berg,
insektekundige van die Noordwes-Universiteit, praat oor geïntegreerde plaagbestryding, spuitprogramme wat op biodiversiteit gerig is en kommandowurm.
Bespreek jou plek by me. Sandra Findlay, sel 082 472 5987; tel.
033 330 2062; e-pos: ntcsandra@ gmail.com; faks 086 579 6926. Bespreek verblyf regstreeks by die ATKV-oord Drakensville. E-pos: drakensville@atkv.org.za; tel. 036 438 6287.