DOSENT TERUG, STEEDS G’N PIEP OOR KUDDE-KLAGTES

DR. Johan van Rooyen is terug in die klaskamer by die Landbou-ontwikkelingsinstituut Grootfontein.

Die Departement van Landbou, Bosbou en Visserye se tugsaak teen dié gerespekteerde staatsveearts en senior dosent het byna ’n jaar lank voortgesleep. Van Rooyen is op 21 Julie verlede jaar geskors te midde van ’n dispuut tussen die vakbonde die PSA en Nehawu op die kampus.

Die dispuut het te doen met ’n ondersoek oor die bestuur van veetroppe en -kuddes op Grootfontein. Van Rooyen is die voorsitter van die PSA op die kampus.

‘MORS VAN GELD’

Hy is sedert 6 Julie terug in sy pos nadat hy ’n skorsing van effektief drie maande uitgedien het. Die saak het egter byna ’n jaar geduur om tot ’n punt te kom, en intussen moes studente by die instituut sonder sy kennis oor die weg kom. Volgens Van Rooyen het die taakspan wat die beweerde korrupsie moet ondersoek, ’n jaar later steeds geen verslag bekend gemaak nie.

“Sover is dit ’n mors van geld. Hoeveel duisende rande het dit nie gekos om al daardie mense af te vlieg en die ondersoeke te doen nie, en dit het nog niks opgelewer nie.”

Die nasleep van die skorsing sluit in verskeie sake wat Van Rooyen teen die departement by die Staatsdiensbemiddelingsraad aanhangig gemaak het. Dit behels onder meer ’n dispuut oor die beweerde onbillikheid van sy skorsing en ’n dispuut oor sy skorsing van drie maande sonder ’n salaris.

E-POSSE

Volgens Van Rooyen het hy ook ’n aansoek ingevolge die Wet op die Bevordering van Toegang tot Inligting ingedien. Dit is om sy vermoedens te bevestig dat die departement toegang gekry het tot e-posse wat hy van sy persoonlike rekenaar af na ’n kollega op Grootfontein gestuur het.

“Ek is besig met die stappe om uit te vind wie in my e-posse rondgekrap en dit onwettig teen my gebruik het in my tugverhoor,” sê hy.

‘Hoeveel duisende rande het dit nie gekos om al daardie mense af te vlieg en die ondersoeke te doen nie, en dit hetnogniks opgelewer nie.’