R1,48 miljoen vir ‘n kilometer heining!

Die DA se voortgesette ondersoeke na infrastruktuurbesteding het skokkende misbruik van belastinggeld aan die lig gebring.

Limpopo se departement van landbou het in antwoorde in die provinsiale wetgewer te kenne gegee R46 miljoen is in die afgelope vyf jaar aan 971 km se geëlektrifiseerde heinings bestee.

Dit is gelykstaande aan gemiddeld R47 000 per km, maar dié bedrag gee nie die skaal van die vermorsing weer nie.

Die duurste projek om weidingsgebiede te omhein, was ’n rooivleisprojek by Modimolle. Daar is R5,6 miljoen begroot om ’n 4 km lange heining van 1,42 m hoog op te rig. Dit beteken dit kos die belastingbetaler R1,48 miljoen per km. Kontrakteurs in die gebied reken dat die koste vir die heining ongeveer R26 000 per km behoort te wees.

Volgens die departement is dit ’n projek wat oor verskeie jare strek. Dit duur vanjaar voort, en R2,8 miljoen is reeds in die 2016-’17-boekjaar bestee. Die projek span 32 werkers in.

HELFTE MINDER

Vir die oprigting van ’n 8 km lange heining van dieselfde hoogte by die Mogalakwena Mapela-rooivleisprojek op Mookgopong, waar tot 105 werkers ingespan is, is sowat die helfte minder — R2,2 miljoen — bestee.

In albei gevalle het die werkers R92 per dag verdien. Vir die 13 km lange “geel lyn”-heining van 1,4 m hoog by Musina en Thulamela is R1,6 miljoen betaal.

Dokumente wat die departement in die provinsiale wetgewer voorgelê het, toon dat R1,3 miljoen betaal is vir die oprigting van ’n 19 km lange nie geëlektrifiseerde heining met ’n hoogte van 1,4 meter by die Seleka-projek op Lephalale. Dertig werkers het daaraan gewerk en dit het vyf maande geduur om dit te voltooi. Volgens die dokumente was dieR1,3miljoenvirdiearbeidendie materiaal. — JOYLENE VAN WYK