OOS-KAAP SE POTENSIAAL ONTGIN
Hoewel dit onwaarskynlik is dat SuidAfrika se wolproduksie weer ’n vlak van 100 miljoen kg sal bereik, is daar wel potensiaal om produksie tot minstens 75 miljoen kg te verhoog, sê mnr. Louis de Beer, uitvoerende hoof van Cape Wools SA.
Die totale produksie vir die afgelope seisoen was 52,5 miljoen kg. Produksie het in die afgelope paar seisoene ’n opwaartse neiging getoon ( GRAFIEK ).
Volgens De Beer is daar groot potensiaal in die Oos-Kaap, wat jare lank reeds die grootste wolproduserende provinsie in die land is. “Nie alleen is daar heelwat onbenutte grond in die Oos-Kaap nie, maar die boere daar is gretig om tot die wolbedryf toe te tree. Ons het egter die samewerking van die Regering nodig om die grond beskikbaar te stel,” sê hy.
Die wolbedryf het reeds groot welslae behaal om kleinwolboere se inkomste aanmerklik te verhoog deur opleiding om
die gehalte en voorbereiding van hul wol te verbeter.
Die volume wol wat dié boere in die afgelope seisoen deur die veilingstelsel bemark het, het met 24,5% tot 4,46 miljoen kg teenoor die vorige seisoen gestyg. Die waarde van die wol wat verkoop is, het met 78,5% tot R233,6 miljoen toegeneem. Dit kan aan die verhoogde produksie en hoër wolpryse toegeskryf word.
Altesame 150 gemeenskappe het tot wolproduksie toegetree. Dit het
die bestaande aantal tot digby 1 400 gemeenskappe verhoog. Dit beteken daar is nou nagenoeg 40 000 individuele kleinwolboere.
“Die opleiding van nuwe toetreders is uiters belangrik. Ons het die kundigheid en kan die landboukolleges bystaan om kursusse saam te stel. Wolproduksie kan ’n groot impak op die maatskaplike toestande in landelike gebiede hê en in ’n groot mate bydra om die inkomste van landelike gemeenskappe te verbeter,” sê De Beer.