VROU VEREER VIR HAAR WYNBYDRAE IN SA EN FRANKRYK
’N STAANDE ovasie het me. May de Lencquesaing (92) begroet toe sy ’n internasionale eerbewys in Londen ontvang het vir haar lewenslange bydrae tot die wynbedryf.
De Lencquesaing (of die ‘Madam Hier Langsaan’ soos sy op Stellenbosch bekend is) het 14 jaar gelede die wynlandgoed Glenelly op Stellenbosch gekoop omdat sy soveel geloof in Suid-Afrika se wynboupotensiaal gehad het.
Die Internasionale Wynuitdaging (IWC) het dié eerbewys aan haar oorhandig om die afgelope 40 jaar, waartydens sy ’n betekenisvolle verskil aan die internasionale wynbedryf gemaak het, te gedenk. Die IWC word alom beskou as een van die wêreld se voorste wynkompetisies met ’n nougesette beoordelingstelsel.
“Min mense maak so ’n verskil op twee vastelande soos sy,” het mnr. Tim Atkin, wynmeester en mede-voorsitter van die IWC, gesê.
WYN-BLOUBLOED
De Lencquesaing is lid van een van Bordeaux, Frankryk, se oudste wyngesinne, die Mialhe. Hul verwantskap met die wynbedryf strek terug tot die 18de eeu. Benewens die bekende Château Pichon Longueville Comtesse de Lalande, het hulle in die verlede of steeds aandele in verskeie ander Bordeaux-wynplase besit. Dit sluit in Siran, Ducru-Beaucaillou en Palmer. De Lencquesaing het
in 1978 die gesinsonderneming oorgeneem nadat sy en haar oorlede man, genl. Hervé de Lencquesaing, die wêreld platgereis het.
In 2007 het sy die wynlandgoed Pichon Lalande aan die sjampanjehuis Louis Roederer verkoop sodat sy haar aandag op Glenelly kon vestig. “Wyn was nog altyd ’n baie belangrike deel van my lewensreis. Ek het in Bordeaux grootgeword en daar gewoon. Dit was ’n wonderlike kans om meer oor wyn en die mense wat dit maak, te leer en dit beter te verstaan,” sê sy.
’N VISIE KRY LEWE
Haar waardering vir Suid-Afrika
se potensiaal om wêreldklaswyn in die regte mikroklimaat te maak, het haar genoop om teen die laer hange van die Simonsberg ’n vrugteplaas te koop. Die vrugtebome het intussen plek gemaak vir ’n wingerd, moderne kelder, bistro en proesentrum. Sy het ook ’n museum vir haar glasversameling en ’n skool vir die kinders op die plaas opgerig.
Haar kleinseuns, Nicolas Bureau en Arthur de Lencquesaing, sit nou hand by op Glenelly.
Atkin sê May word dikwels as formidabel – in Engels én Frans – beskryf.
“Nou, in haar tiende dekade, met haar tien kleinkinders en tien agterkleinkinders daarby, bly sy ’n krag om mee rekening te hou. Enigeen wat gelukkig genoeg was om ’n bottel van die legendariese Pichon Lalande 1982 te drink en die grondslag te sien wat sy by die château gelê het, sal erken wat sy in Bordeaux reggekry het.
“Diegene wat die onlangse oesjare van haar Glenelly Lady May rooiwyn geproe het, sal verstaan wat sy in Suid-Afrika bereik het.”