SPESIAAL Vroue in die landbou
Menige verslaggewer wat die hoofstroommedia vir die landboujoernalistiek verruil, verlaat nooit weer dié nis nie. Só het me. Magda du Toit, voorsitter van Landbouskrywers SA en Monsanto se bestuurder van korporatiewe skakeling en kommunikasie, ook vir ewi
Die toeval het ’n roeping het geword, sê me. Magda du Toit. Sy werk al 30 jaar as joernalis en skakelbeampte, waarvan omtrent die helfte van die tyd in die landboubedryf se kommunikasiekringe. Sy is al 17 jaar in diens van die biotegnologie-en-saadmaatskappy Monsanto Suid-Afrika.
Dié Pretorianer het haar loopbaan as joernalis by ’n plattelandse koerant in Bela-Bela begin nadat sy die graad B.A. in kommunikasiekunde aan die voormalige Potchefstroomse Universiteit behaal het. Sy het ook ’n nagraadse diploma in bemarkingsbestuur aan Unisa verwerf.
Magda is met Neels getroud. Hulle het ’n dogter, Elriëtte, en ’n seun, Cornel.
Van die gemeenskapskoerant is sy as joernalis na die Departement van Landbou. Later was sy redakteur van die weeklikse departementele nuusbrief. Só het sy vir die eerste keer betrokke geraak by die Landbouskrywers SA, die bedryfsliggaam vir landboujoernaliste in die land.
“Ek vind my toe só tuis in die landbou-omgewing dat ek nog nooit regtig daaraan gedink het om in ’n ander bedryf te gaan werk nie,” sê sy.
LANDBOUSKRYWERS
Magda is die afgelope agt jaar die nasionale voorsitter van die Landbouskrywers SA, wat al jaar 40 jaar bestaan.
Die Landbouskrywers SA se eerbewyse aan die Boer van die Jaar en die Landboukundige van die Jaar is ’n jaarlikse hoogtepunt op die landboukalender. Op dieselfde geleentheid word die Landboujoernalis en Landboufotograaf van die Jaar ook aangewys.
“Ons vereer graag die mense in die bedryf wat ambassadeurs is vir die landbou, hetsy as boere, landboukenners of joernaliste.”
Suid-Afrika was vanjaar in April die gasheerland van die Internasionale Federasie vir Landboujoernaliste (IFAJ) se jaarlikse kongres en landboutoer. Suid-Afrika is die enigste land in Afrika wat al die IFAJ-kongres aangebied het. Nico van Burick van Landbouweekblad het die reëlingskomitee gelei.
“Dit was ’n belewenis om landboujoernaliste van oor die hele wêreld aan ons mooi land en sy mense, maar veral ons landboubedryf, bekend te stel,” sê Magda.
“Dit maak ’n mens trots om te wys wat ons boere vermag en hoe die sektor presteer ondanks vele struikelblokke. Die artikels wat die besoekende joernaliste oor Suid-Afrika in hul lande publiseer, vertel hierdie stories en dien as toonvenster vir ons landbou.
“Natuurlik was daar baie vrae oor kwessies, soos misdaad en regeringsbeleid, maar die algemene indrukke was gunstig.”
DAGTAAK
Monsanto bied unieke uitdagings aan die mense wat daar werk.
“’n Groot deel van my verantwoordelikheid is om mense oor biotegnologie in te lig. Ek is verantwoordelik vir alle korporatiewe kommunikasie en skakeling met die klem op mediaskakeling en skakeling met die landboubedryf en verwante organisasies in die waardeketting.
“Dit is my verantwoordelikheid om stories oor Monsanto se werk te identifiseer en oor te vertel. Ek is ook betrokke by borgskappe en projekte in die gemeenskappe waarbinne Monsanto sake doen.”
Magda sê die landbou maak haar sowel opgewonde as nederig as sy sien watter verskil inligting en tegnologie aan mense se lewe kan maak.
“Ek vind aanklank by die aardsheid, geesdrif en toegewydheid van die mense in die landbou. Om in hierdie bedryf te werk is om naby die natuur te leef. Dit bring ’n mens ook nader aan ons Skepper en bring ’n besef van hoe afhanklik ons van sy genade is. Nie een dag is presies dieselfde nie. Daardie verskeidenheid bring rykheid en volheid in ’n mens se beroep.”
Die landbousektor bied baie verskillende beroepe.
“Almal hoef nie te boer nie. Gaan bekwaam jou in ’n rigting wat tot jou spreek – volg jou hart, maar moenie jou rede verloor nie,” sê Magda.