Bedryfskenners op OBP se nuwe raad bring hoop

DIE hoogs aansteeklike H5N8voëlgriepvirus het oor ’n groter afstand versprei as wat aanvanklik vermoed is, sê dr. Mike Modisane, hoofdirekteur van diereproduksie en -gesondheid by die Departement van Landbou, Bosbou en Visserye.

Meer as 813 000 hoenders moes van kant gemaak en byna 3 miljoen eiers vernietig word weens die virus wat op drie plase in Mpumalanga en een in Gauteng uitgebreek het.

Kort voor druktyd is nóg ’n uitbreking op ’n kommersiële plaas in die omgewing van Standerton bevestig (sien KASSIE hieronder). Dit is die vyfde voorval op ’n kommersiële plaas. Sodra ’n uitbreking bevestig word, word die plaas onder kwarantyn geplaas.

Modisane het aan die Parlement se portefeuljekomitee vir landbou, bosbou en visserye gesê die afstand waaroor die virus voorkom – van Standerton tot Centurion in Pretoria (oor sowat 200 km) – is kommerwekkend.

“Hoewel dit lyk asof dit gelokaliseer is, is dit kommerwekkend hoe ver dit strek.”

Teen 31 Julie was daar altesaam 10 uitbrekings van die virus, waarvan vier op kommersiële plase was. Die drie plase in Mpumalanga is aan die Mpumalanga-oewer van die Vaalrivier, naaste aan die Vrystaatse dorp Villiers, Standerton en die omgewing van Balfour en Kendal. Die geval in Gauteng is in die omgewing van Boksburg. Lede van die publiek het drie uitbrekings onder wilde voëls aangemeld. Daar was nog twee uitbrekings onder werfhoenders en by mak voëls in Vanderbijlpark.

Modisane sê genetiese ontleding dui aan dat die stam van die eerste uitbreking naby Villiers soortgelyk is aan uitbrekings in Egipte verlede jaar, en dié by Val in Standerton is soortgelyk aan uitbrekings in Zimbabwe.

HITTEWEERSTAND

Naas streng maatreëls wat tans geld om die verspreiding van die virus te keer, hoop owerhede hoër somertemperature sal verdere verspreiding voorkom omdat H5N8 nie hitteweerstandig is nie. Modisane sê in Uganda het die somerhitte die virus vanself laat doodloop. Egipte, wat sy hoenders teen die virus ingeënt het, het gesê dié voorkomingsmaatreël was ’n fout.

VERGOEDING

Die Tesourie is intussen genader om R23 miljoen goed te keur as vergoeding vir boere wie se pluimvee vrekgemaak moes word. Mnr. Mooketsi Ramasodi, waarnemende direkteur-generaal by die departement, sê daar was nie tyd om te wag vir toestemming van die Tesourie vir die vergoeding voor die hoenders van kant gemaak is nie.

Ramasodi sê dié uitbreking wys geld moet vinniger beskikbaar gestel word sodat die departement kan optree. “Die uitbreking dui op ’n blinde kol ten opsigte van hoe ons ons eie ramphulpgeld bestuur.”