Hart tot hart
Die wysheid van die grysheid is een van die wonderlikste gawes wat die Here aan die mensdom gegee het – net jammer dat dit meesal aan ou mense gegee word! Stel jou voor hoe dit sou wees as die Gewer van alle goeie gawes die volgorde so bietjie anders gemaak het. Dan sou die jeug, wie se lewe nog grootliks voorlê en op wie al die besluite nog wag, die voordeel hê om veel vroeër die regte koers te kies.
Kom ons wees eerlik en erken dat ’n klomp wysheid van die grysheid êrens in ’n hoek uitgerangeer is vanwaar hulle die snel veranderende wêreld kopskuddend gadeslaan. Wat is dit anders as onbenutte en verspilde krag? Om nie eens te praat van die groot klomp wysheid wat lankal reeds onder die kluite toegegooi is nie.
Mense word volgens ouderdom gekategoriseer en as jy oor ’n bepaalde ouderdomsgrens beweeg, moet jy plek maak vir ’n jonger een. Maak nie saak of die gryse nog voluit en pragtig kan diens lewer nie. Ja, toegegee, ’n mens kan ook, as gevolg van selfoorskatting, té lank aanhou en dan die tempo van dinge vertraag.
Laat ons daarop bedag wees om nie vas te klem aan uitgediende werktuie nie. Daar bestaan genoeg slegte voorbeelde van leiers wat nie kon ophou om die spreekwoordelike koek tot die laaste krummel te verorber nie. Tussen té vroeg en té laat loop daar ’n goue lyn waar die wysheid van die grysheid nog ’n goeie bydrae kan lewer, al is dit net om raad te gee wat uit dure ondervinding gebore is. Wie dít verontagsaam, is soos die man wat weer die wiel probeer ontwerp.
Toe Rehabeam sy beroemde vader, koning Salomo, moes opvolg, het hy die verstandige ding gedoen om verskeie mense te raadpleeg oor hoe hy die volk moet regeer. Heel eerste het hy die wysheid van die grysheid genader en toe die voortvarendheid van die jeug. Hy’t besluit om die jong manne se raad te volg – met noodlottige gevolge vir sy koningskap (1 Kon.12).
Jy kan nie wysheid koop nie, maar jy kan dit soek en gratis kry by die grysheid wat die pad voor jou geloop het.
Jy kan nie wysheid koop nie, maar jy kan dit soek en gratis kry by die grysheid.