Van oraloor
DIE rugbyspan van Elsenburg, die Wes-Kaapse instituut vir landbou-opleiding naby Stellenbosch, het die 37ste keer die Pannar-rugbyweek vir landboukolleges gewen.
Agt van Suid-Afrika se landboukolleges het om die IPJ du Plessis-trofee by Fort Cox, die opleidingsinstituut vir landbou en bosbou, naby King William’s Town meegeding.
Vanjaar was dit egter nie so maklik vir die verdedigende kampioen om hond haaraf te maak teen die Landboukollege Grootfontein (Middelburg, Oos-Kaap), sy teenstander in die eindstryd, nie. Die Wes-Kapenaars het Grootfontein met 2620 geklop. Hul kragmeting is ook as die beste wedstryd van die toernooi met die Willie van Zijl-trofee beloon.
Potchefstroom was derde deur Glen met 22-7 te verslaan.
Die toernooi word in twee afdelings verdeel, naamlik ’n beker- en ’n plaatafdeling. Die spanne speel op die eerste dag teen mekaar en word volgens hul spel in twee groepe verdeel. Die wen- en verloorspanne ding dan in dié verskillende afdelings op ’n rondomtaliegrondslag teen mekaar mee. Die plaatafdeling is deur Cedara gewen.
Die toernooi is die eerste keer in 1969 aangebied met vyf spanne wat teen mekaar meegeding het. In 1987 het Pannar die borgskap oorgeneem. Vanjaar was die 31ste jaar wat die toernooi deur Pannar Saad geborg is.
TROFEE-WENNERS
Elsenburg – Wenner van die toernooi, mees konstruktiewe rugby en die span met die meeste drieë in die bekerafdeling. Sterling Naudé (Elsenburg) – Speler met die meeste punte. Attie van Rensburg (Elsenburg) – Beste voorspeler. Bradley Oerson (Glen) – Beste agterspeler.
Elsenburg en Grootfontein – Beste wedstryd. Cedara – Wenner van die plaatafdeling en die span met die meeste drieë in die plaatafdeling. –