INDRINGERPLANTE: HOE GEMAAK MET ‘MOEILIKE’ BURE?

Die nuusberig “Omgewingsbe- waring: Indringerwet kom stadigaan op dreef” deur Fredalette Uys (LBW, 29 Julie 2016) het betrekking.

Daar is sover my kennis strek nog baie min oor indringerplante in LBW geskryf. Luidens die betrokke berig kan ’n boer homself groot boetes en selfs tronkstraf op die hals haal indien hy nie sy kant bring om van die indringerplante op sy grond ontslae te raak nie.

In my gebied is veral swartwattel-, populier-, sering- en jakarandabome ’n probleem, asook bankrotbossie.

In die verlede het die Department van Omgewingsake ons boere van gif voorsien om van die indringerplante uit te roei, maar daardie hulp is intussen opgeskort omdat daar nie geld is ne.

My grootste probleem is my een buurman se swartwattelbome en albei my buurmanne se bankrotbossies. Die saad word deur die wind versprei en dié indringers vestig hulle op my grond. Al die indringerplante gebruik geweldig baie water en moet uitgeroei word.

Ek het reeds in 1995 ál die swartwattelbome op my grond tot niet gemaak, maar moet steeds jaarliks beheer toepas en dié wat nog opkom, uitroei. Dit is ’n groot uitgawe vir my as pensioentrekker.

Ek is by die departement geregistreer en die departement het al verskeie kere met die bure in verbinding getree, maar daar word niks verder gedoen nie.

Ek is 71 jaar oud en het tot nou toe ál my werk self gedoen, maar my gesondheid laat dit nie meer toe nie.

Kan u asseblief ’n artikel plaas oor indringerplante, hoe dit kostedoeltreffend uitgeroei kan word, wat ’n grondeienaar kan doen om die bure te oorreed om hul kant te bring en só saam die probleem op te los en wat ’n grondeienaar se opsies is vir optrede teen ’n buurman wat nié sy kant wil bring nie?

Ek sal dit vreeslik waardeer indien u grondeienaars, soos ek, kan help om onsself te beskerm deur die korrekte, wettige stappe te doen en die probleem so kostedoeltreffend moontlik aan te pak. HANS VAN LOGGERENBERG Zeerust Dankie vir u voorstel. Ons sal dit beslis oorweeg. — Red.