Kundigheid op OBP se nuwe raad bring hoop

ONDERSTEPOORT BIOLOGIESE PRODUKTE (OBP) se nuwe direksie is kort voor druktyd aangewys en is van 1 Augustus in hul poste.

Dr. Pieter Vervoort, voorsitter van die Nasionale Dieregesondheidsforum en nuwe direksielid, meen dit is ’n gebalanseerde raad, met lede wat kennis en ervaring oor verskeie velde heen het. Die raadslede, naas Vervoort, is: Me. Koekie Mdlulwa, besturende direkteur van Mdlulwa Nkuhlu-prokureurs; Dr. Charlotte Nkuna, direkteur van die Suid-Afrikaanse Pluimveevereniging (SAPV) en voormalige direkteur van die SAPV se pluimveesiektebestuursagentskap; Me. Fulufhelo Mphuthi, elektriese en elektroniese ingenieur, van Rand Water; Mnr.RonaldRamabulana,hoof van opleiding en opvoeding by Absa en voormalige uitvoerende hoof van die Nasionale Landboubemarkingsraad; Mnr. Yaasir Haffejee, van die Ouditeur-generaal se kantoor; Vir boere is veral die aanstelling van drs. Nkuna en Vervoort goeie nuus omdat daar al lank kommer heers oor ’n uitvloei van kundiges uit dié maatskappy.

Me. Zodwa Mobeng, waarnemende uitvoerende hoof van die OBP, sê die organisasie is opgewonde oor die vooruitsig om met die nuwe raad saam te werk. “Met hul leiding en kundigheid het ek geen twyfel dat hulle die OBP tot hoër hoogtes gaan neem nie,” het sy gesê.

Landbouweekblad het die afgelope week wyd by koöperasies en by die OBP self navraag gedoen oor die beskikbaarheid van entstof. Na verneem word, is entstowwe geredelik beskikbaar vir die belangrikste veesiektes waarteen boere hul diere in die lente moet inent, insluitende bloutong, brucellose, slenkdalkoors, knopvelsiekte en Afrika-perdesiekte.