Populisme en emosie hoort nie in gronddebat - Phosa
DIE staat is die grootste grondeienaar in SuidAfrika en grondhervorming behoort dus by staatsgrond te begin, meen dr. Mathews Phosa, wat in April as ANCleier benoem is.
“Die Regering moet mooi gaan dink oor hoe hy ongebruikte staatsgrond kan verdeel. Die grond wat net gebruik word deur militêre magte wat oefen vir ’n oorlog wat nie kom nie, moet vir die mense gegee word,” sê hy.
Hy het ’n “groot, groot” probleem met ongrondwetlike uitsprake oor grond.
“Ek was een van die mense wat die Grondwet help opstel het. Toe ons by Kodesa was, het ons baie voorbeelde in Afrika gesien waar grondhervorming nie gewerk het nie. Ons het toe gesê ons moet ’n proses definieer hoe grond van een hand na ’n ander beweeg. As mense my oor grondvergrype uitvra, sê ek hulle moet na die Grondwet kyk. Daar is dinge wat jy kan doen, en dinge wat jy nie kan doen nie.”
GRONDWET
Phosa sê die Grondwethof sal SuidAfrikaners beskerm teen optrede wat strydig is met die Grondwet, en leiers moet help om emosie uit die grondvraagstuk te verwyder.
“Enige leier, of dit nou die President of wie ook al is, moet kalm en koelkop bly as ons oor grond praat en beleid formuleer. As politici moet ons gematig wees in wat ons sê en goeie verhoudings tussen boere en plaaswerkers bevorder. Ons is nie mekaar se vyande nie, maar vennote. Dís die oplossing tot die grondprobleem,” meen Phosa.
Hy het ook beklemtoon hoe belangrik dit is om mense op te lei om kommersiële boere te word.
“Ons het nou meer mense wat grond ontvang, maar wat doen hulle daarmee? Dit raak ’n probleem. Ons moet dit vanuit ’n kommersiële oogpunt benader. As ons vir iemand ’n stuk grond gee, moet ons weet wat hulle daarmee gaan doen,” sê Phosa.
‘Ons is nie mekaar se vyande nie, maar vennote. Dís die oplossing tot die grondprobleem.’