REGISTREER NOU VIR VALSKODLINGMOT

PERSKE- en nektarienboere wat vrugte na die Europese Unie en Brittanje wil uitvoer, sal voortaan hul boorde moet registreer. Dit is omdat valskodlingmot ’n nuwe status as beheerde plaag in die Europese Unie verkry het.

Tot dusver het dié plaag nie groot ekonomiese risiko’s vir steen vrugtebedryf ingehou nie en formele inspeksies was nie nodig nie. Vrugtebesendings is ook nie afgekeur op grond daarvan nie, maar nou sal boere in hul spoor moet trap om dit só te hou.

Sowat 4,2 miljoen kartonhouers (ongeveer 70% van die uitvoeroes) met Suid-Afrikaanse perskes en nektariens word jaarliks na die EU uitgevoer. Die nuwe regulasies geld vanaf die 2017-’18-steenvrugseisoen en is spesifiek op perskes en nektariens van toepassing.

Volgens mnr. Hugh Campbell, hoofbestuurder van Hortgro Science, het die EU dié fitosanitêre regulasies ook ingestel vir sitrus (afgesien van suurlemoene), granate en soetrissies wat uit Afrika, Mauritius en die Afrika-eilande kom.

OPSIES

Die EU vereis dat vrugte verkry word van lande, streke of produksiepunte wat vry is van valskodlingmot. Daar is egter ook ’n opsie om te bewys dat besendings vry van dié plaag is. Dit is die roete wat die steen vrugtebedryf gekies het.

Alle perske- en nektarienboorde vanwaar daar vrugte na die Europese Unie, Brittanje en Amerika uitgevoer word, moet teen 1 September op ’n aanlyn, elektroniese platform, die Peach and Nectarine FCM Management System, geregistreer word. Dit word deur die bedryf met die samewerking van die Departement van Landbou, Bosbou en Visserye bestuur.

Dié platform sal voor-oespraktyke monitor, sowel as lewering by pakskure en die punte waar die Raad van Toesig op die Uitvoer van Bederfbare Produkte (PPECB) en die staat vrugte inspekteer.

’n Uiters streng benadering sal gevolg word indien valskodlingmot by enige van dié punte gevind word. Die onus rus dus op boere om te verseker dat die regte beheermaatreëls in boorde toegepas word.

BESTUURSTAPPE

“Ons moet kan spesifiseer watter stappe ons doen om dit reg te kry. Die valskodlingmot-bestuurstelsel is ’n meganisme om die valskodlingmot regdeur sy lewensiklus te bestuur en seker te maak daar is geen onderskeppings van valskodlingmot nie,” verduidelik Campbell.

Hy het die stelsel met ’n verkeerslig vergelyk wat produkte slegs in die uitvoerketting sal toelaat indien dit aan die vereistes voldoen.

“Die boord is eintlik die enigste plek waar ’n mens valskodlingmot kan bestuur,” sê Campbell. Boere sal goeie landboukundige praktyke aan die dag moet lêe n noukeurig moet rekord hou om die Europeërs te oortuig hul produkte is vry van valskodlingmot.

“Valskodlingmot is nie ’n vername plaag by perskes en nektariens nie en het voorheen nie ’n groot ekonomiese risiko ingehou nie. Ons hele benadering sal egter moet verander omdat dit nou ’n fitosanitêre plaag is. Doeltreffende monitering en sanitasie tydens die vooroes-, voorverpakkings-en verpakkingsfase is belangrik.”

Daar is die afgelope jaar tien bykomende chemiese produkte geregistreer wat boere nou kan gebruik om valskodlingmot te beveg,sêhy. —

‘Ons hele benadering sal egter moet verander omdat dit nou ’n fitosanitêre plaag is.’