DROOGTEHULP VIR DORPE
‘n Gereedskapskis met riglyne en metodes wat munisipaliteite kan gebruik om hulle teen droogte en watertekorte te pantser, is deur die Water navorsings kommissie ontwikkel. Dis daarop gerig om plaaslike owerhede hul waterstelsels te help ontwikkel om optimaal te funksioneer, en waterverliese te beperk.
“Die Departement van Water en Sanitasie se water-rekonsiliasie-studie van alle dorpe het gewys dat waterbronne in 30% van Suid-Afrikaanse dorpe reeds te min is om in die vraag te voorsien. Verdere watertekorte word in die volgende vyf jaar in nog 13% van die dorpe verwag, en in ’n verdere 12% dorpe in die volgende vyf tot tien jaar,” sê die kommissie.
Voorts is die meeste van Suid-Afrika se ekonomies ontginbare oppervlak waterhulpbronne reeds volledig ontwikkel en benut, en geleenthede vir die ontwikkeling van nuwe, ekonomiese damme is skraal.
“Hierdie situasie veroorsaak dat die land se waterhulpbron bestuurders voortdurend ’n balanseer toertjie tussen vraag en aanbod moet uithaal. Dit laat ook min ruimte vir ekstreme toestande, soos ’n droogte.”
Daar word voorspel dat klimaat verandering die voorkoms van droogtes in Suid-Afrika gaan vererger. “As ons intenser, gereelder droogtes kan verwag, met tydperke van hoë reënval oor korter tydperke tussendeur, sal ons slimmer moet word in ons bestuur en bedryf van die land se waterstelsels.
“Dít is veral belangrik vir die land se munisipaliteite, wat regstreeks vir dienslewering aan gemeenskappe op grondvlak verantwoordelik is.”
Die riglyne van die Water navorsings kommissie, wat juis destyds in reaksie op’ n vorige intense droogte tot stand gebring is, vir munispaliteite dek ’n wye reeks onderwerpe. Dit sluit in waterbewaring, die bestuur van wateraanvraag, bedryf en onderhoud, die vermindering van waterverliese, en hoe om gemeenskappe se waterverbruik s gedrag te verander.
Daar is ook gidse oor hoe om byvoorbeeld water te herwin.
Die stel riglyne en gidse kan deur die webportaal droughtsa.org.za bereik word.
— MARLEEN SMITH