SORG VIR DIE SWAMME, EN HULLE SORG VIR JOU
Swamme speel ’n deurslaggewende rol in die bekamping van hittestres in droë grond, bewys nuwe navorsing.
Die eenvoudige boodskap daaragter is dat boere meer swamme in droë saaigrond nodig het, sê dr. Hendrik Smith, bewaringslandbou-koördineerder van Graan SA.
Navorsers van die Helmholtz-sentrum vir omgewings navorsing in Leipzig, Duitsland, wys in ’n artikel in die vaktydskrif Nature Communications daarop dat die aktiwiteit van grondbakterieë onderdruk word as grond uitdroog.
Hulle het ’n vernuwende kombinasie van hoogs gevorderde ontleding-en uitbeeldings tegnieke gebruik. Dít het tot die ontdekking gelei dat swamme die aktiwiteit van bakterieë in droë en arm gronde verbeter deur aan die bakterieë water en voedingstowwe te verskaf.
Swamme versprei deur grond met ’n fyn netwerk van dun draadjies genaamd hife (hyphae). Dié netwerke groei konstant en in verskillende rigtings in hul soeke na vog en voedingstowwe. Dit word dan deur die hife-netwerk vervoer, ook na droër en armer dele van die grondprofiel. Dít bevoordeel nie net die swamme nie, maar hulle verskaf ook die bakterieë daar van die water en voeding wat hulle nodig het om te floreer.
Dié feit word al lankal vermoed, maar die Duitse wetenskaplikes het dit nou die eerste keer gedemonstreer met nuwe spektrometrie-tegnieke.
Met dié ontledings metodes kon hulle akkuraat bepaal hoe water, substrate en ander voedingstowwe deur die mikroskopies klein hife van die swamme vervoer word.
Hul eksperimente het gewys hoe swamhife spore van die bakterie Bacillus subtilis heraktiveer het. Spore is die onaktiewe fase van Bacillus wat vorm as daar nie genoeg water en voeding vir bakteriese groei beskikbaar is nie.
Die bakterie ontwaak net uit hierdie dormansie sodra toestande vir groei weer gunstig is.
Dié ontdekking van die noodsaaklike rol wat swamme speel om droogtestres in te perk, word as ’n belangrike nuwe insig in die stryd teen klimaat verandering beskou.
“Swamme dien as pompstasies en pyplyne vir water, substrate en voedingstowwe, en kan onherbergsame plekke koloniseer, dit vir bakterieë in gunstige habitatte omskep en sodoende mikrobiese aktiwiteit in die grond stimuleer.
“Die resultate van hierdie jongste studie demonstreer opnuut dat swamme deur hul interaksie met bakterieë ’n betekenisvolle, voorheen onderskatte, rol in die grondekostelsel speel,” sê die navorsingspan.
–