KONTAK MET PLAASDIERE BESKERM TEEN ASMA
Plaaskinders se algemene groter weerstand teen allergieë en asma is nie net danksy die baie meer mikrobes waarmee hulle in die plaaslewe in aanraking kom nie.
’n Suur wat algemeen in die speeksel van plaasdiere voorkom, is ook ’n doeltreffende teenvoeter teen ontsteking van longweefsel, is in ’n Switserse studie bevind.
Al hoe meer mense ly aan allergieë en asma, veral in nywerheidslande. ’n Beraamde 30% van alle kinders ly deesdae aan ’n allergie, sê die Universiteit van Zürich in ’n verklaring.
Die uitsondering is egter plaaskinders, onder wie die siekte teen ’n veel laer koers toeneem as onder kinders wat in dorpe en stede woon.
Tot dusver is aangeneem dat dit bloot danksy die hoër aantal en groter diversiteit van mikrobes is, soos in minder higiëniese toestande die geval is. Sulke mikrobes bevorder die ontwikkeling van ’n immuunstelsel.
Die Switsers het egter nou ontdek dat kontak met die nie-mikrobiese suur Neu5Gc ook die ontwikkeling van teenliggaampies in mense aan die gang kan sit. Dié suur kom algemeen in die speeksel van gewerweldes – plaasdiere inkluis – voor.
Weens ’n genetiese mutasie kan mense dit egter nie produseer nie. Mense kan dit wel inneem deur kontak met diere of deur kos van diere-oorsprong te eet.
Die navorsers, onder die leiding van die immunoloog dr. Remo Frei, het die konsentrasie van Neu5Gc-teenliggaampies in serum-monsters van meer as 1 000 kinders gemeet. Die resultate het gewys daar was baie meer teenliggaampies teen Neu5Gc in plaaskinders se bloed, en kinders met meer teenliggaampies het aansienlik minder aan asma gely. — MARLEEN SMITH