AFRIKA: BENUT DIE GROOT POTENSIAAL
Afrika is ’n landstreek wat braak lê en wag vir die veredelende invloed van Suid-Afrikaanse vleisbokke op die inheemse Afrikabokke vir verhoogde vleisproduksie.
Dr. André van Rooyen, ’n navorser van die internasionale gewasnavorsingsinstituut vir die halfdroë Trope (ICRISAT) in die ontwikkelende markte van Afrika en SuidAsië, sê daar is ongekende belangstelling in plaaslike vleisbokke.
Bokke verteenwoordig vir die burgers van Afrika veel meer as net die intrinsieke waarde van die diere. “Die bok simboliseer ontwikkeling en vooruitgang. Die meeste inkomste uit die bokbedryf word aan mense se kos, opvoeding en gesondheid bestee.”
Een van die mikpunte in Zimbabwe, Tanzanië, Mozambiek en Malawi is die verbetering van landbouproduksie deur die bevordering van geïntegreerde landboustel-
sels onder bestaansboere.
Dit behels ook die ontwikkeling van markte waar tot 300 bokke op ’n veiling aangebied word met byna dieselfde getal verkopers. Dit is in teenstelling met Suid-Afrika, waar dieselfde getal deur een of twee telers per produksieveiling aangebied word.
“Bestaansboere in Afrika verbou mielies, sorghum, peulplante en boer met bokke en beeste,” sê hy. Aangesien die diere die oesreste moet benut, word aanbevelings gemaak vir plantkultivars waarvan die reste hoogs verteerbaar is, met genoeg stikstof.
In dele van Zimbabwe, waar André al tien jaar lank betrokke is, het sy span al die sterftesyfer onder bokkuddes van 20% tot minder as 10% verminder. Sulke suksesvolle boere slaag daarin om meer geld in die volgende vlak van veeverbetering te herbelê.
Hy reken die waarde van die Suid-Afrikaanse bokbedryf is “astronomies hoog” en dat Suid-Afrika ’n bydrae kan lewer om die
bokbedryf in ander lande te verbeter.
“Botswana en Namibië is ver ontwikkel, maar as die drie miljoen bokke in ’n ontwikkelende land, soos Zimbabwe, met Boerbokke vervang word, kan vleisproduksie styg.”
Bokvleis is baie gesog in Afrika, maar dit word nie kommersieel benut nie.
André is vas oortuig van die plaaslike bokboer se morele verpligting om sy medeboere in Afrika te help. “Suid-Afrikaners het ’n groot verantwoordelikheid om die Afrika-boer te help. Die opleiding van nuwe toetreders tot die bedryf verdien dringend aandag. Afrika moet voorrang kry, veral met die oog op die ontwikkeling van markte.”
Hy sê die produksie van rooivleis sal oor die volgende twee dekades verdubbel moet word om met die huidige behoefte aan proteïen in Afrika tred te hou. “Ons lê te veel klem op Europa en ander vooruitstrewende gebiede. Ons grootste mark vir vleisproduksie en goeie teelmateriaal lê in Afrika.”