‘Hope potensiaal in landbou’
Die vroue in Monsanto se Suid-Afrikaanse span is talentvol en vol werkywer. Hulle sê die landboubedryf – en dié maatskappy – is net die plek om persoonlike en professionele doelwitte te verwesenlik.
Die paadjie wat Monsanto se vroue tot by hul huidige poste gelei het, getuig van hul verbintenis om volhoubaarder kosproduksie met behulp van biotegnologie moontlik te maak.
“Ek het by GrootMarico op ’n plaas grootgeword en albei my ouers het naby aan die natuur gelewe. Daarom dink ek die landbou was van kleins af in my bloed,” sê ME. JACOLENE SWART, Monsanto se produksienavorsingshoof vir Afrika.
Sy werk reeds 14 jaar lank by dié maatskappy. Sy skryf die graad B.Tech. in gewasproduksie, sowel as die grade Hons.B.Sc.Agric. en M.Sc.Agric. in planteteelt agter haar naam.
As hoof van produksienavorsing vir Afrika kyk Jacolene na al die navorsing wat Monsanto op sy ouerlyne doen sodat mieliesaad so doeltreffend moontlik gelewer en aan verbruikers verskaf kan word.
“Dit behels meestal veldproewe in verskillende Afrikalande waar ons saad lewer, maar veral in SuidAfrika, Zambië, Malawi, Kenia en Tanzanië.
“Ek is baie geseënd om na verskeie lande te reis en met boere in aanraking te kom. Hul vernuwende denke en deursettingsvermoë in moeilike toestande verstom my. Dit dien ook as aansporing om telkens anders te dink oor hoe ek my eie lewe en loopbaan benader.
“Deur inligting en kennis uit te ruil kan Monsanto ’n reuseverskil maak in mense se lewe, veral in Afrika.”
Jacolene glo ’n mens moet doen wat jou gelukkig maak.
“Baie mense vra my soms of ek nie voel ek beweeg in ’n manswêreld nie. Nee, glad nie! Ek doen waarvan ek hou.
“Vroue het so baie opbouende bydraes wat hulle tot die bedryf kan lewer. My raad aan hulle is daarom om nooit op te hou met selfontwikkeling nie. Bly opgeskerp met die nuutste inligting in jou bedryf.”
GEHALTEBEHEER
DR. NICOLETTE DU RAND is Monsanto se gehaltebeheerbestuurder vir Afrika. Sy werk nou sowat 4½ jaar vir Monsanto. Sy het haar doktorsgraad in plantpatologie verwerf.
Nicolette bestuur al Monsanto se gehaltebeheerlaboratoriums in Afrika. Sy is ook verantwoordelik vir die vestiging van nuwe laboratoriums en gehaltebeheertoetse in Afrika. Sy neem ook besluite oor die bekendstelling van saad, gegrond op gehaltetoetsresultate.
“Ek behartig ook die opleiding van personeel in die gehaltebestuurstelsel en die toepassing daarvan by enige van die nuwe laboratoriums in Afrika.”
Nicolette se akademiese agtergrond en navorsing het haar belangstelling in die landbou geprikkel.
“Ek het al hoe meer betrokke en geïnteresseerd geraak. Elke dag is uniek en het sy eie uitdagings. Ek is nooit verveeld nie en is trots daarop dat ek en my span seker maak die saad wat Monsanto verkoop, is deeglik getoets en van puik gehalte.”
Nicolette sê die landbou bied baie geleenthede vir jong mense.
“Die wêreld moet gevoed word en dit is nie sonder die landbou moontlik nie. Ek raai enigeen aan om naskools verder te studeer, al is dit vir ’n diplomakwalifikasie.”
VRAAG EN AANBOD
ME. LEHANDRIE FREEMAN is Monsanto se binneseisoenbeplanningsbestuurder. Sy werk al sewe jaar by die maatskappy.
Die graad B.Com. in bestuursrekeningkunde rus haar toe om die nodige aanpassings te bereken rakende vraag en aanbod op kort termyn, die onmiddellike behoeftes van kliënte en hoe om dit in pas te bring met Monsanto se finansiële doelwitte vir SuidAfrika.
“Al die aktiwiteite gekoppel aan die verkoop en bedryfsproses, soos die beplanning van die huidige seisoen se vraag
en voorsiening, is deel van my verantwoordelikhede. ’n Groot voorrangsaak in my daaglikse beplanning is die minimalisering van produkafskrywings.”
Lehandrie sê dit was ’n doelbewuste loopbaanskuif om deel te word van ’n maatskappy wat nie net in ’n groeiende bevolking se voedselbehoeftes wil voorsien nie, maar ook die planeet wil beskerm en lewens wil verbeter.
“My boodskap aan veral jong mense is om jouself met kundiges te omring.
“Kry ’n mentor in die bedryf om jou doelwitte en drome reg te kommunikeer. Voer gesprekke met jou seniors of mentor(s). Jy moet baie deursettingsvermoë hê. Die sukses wat jy sal smaak wanneer jy jou doelwit bereik, is baie soet.”
Lehandrie sê sy en haar gesin geniet dit om tyd saam deur te bring deur saam te draf en fiets te ry. Sy is ’n ywerige deelnemer aan padwedlope en het die afgelope twee jaar aan die Two Oceanspadwedloop deelgeneem as deel van die Run for the deafveldtog om geld in te samel vir gehoorgestremdes op Worcester.
BEMAGTIGING
Met die graad LL.B. en meer as sewe jaar ondervinding in SEBtransformasiebestuur, is
ME. PARUSHA PILLAY die ideale kandidaat om Monsanto se regeringskakeling en strategie vir swart ekonomiese bemagtiging te bestuur.
Parusha werk sowat 18 maande by Monsanto SuidAfrika. Sy is verantwoordelik vir die bestuur en toepassing van die die transformasiestrategie en lê klem op goeie verhoudings met die Regering, politici en soortgelyke organisasies.
“Ek het toevallig in die landbousektor beland, maar dit is wonderlik om saam met ’n diverse groep mense te werk wat so geesdriftig is oor dit wat hulle doen. Dit is ook wonderlik om te sien hoe dit wat jy doen, ’n verandering in mense se lewe meebring. Dit is ’n baie bevredigende ervaring.”
Parusha se raad aan jong mense is om hard te werk, maar ook slim te wees.
“Gebruik elke geleentheid wat jy kry om te leer en ondervinding op te doen.”
ONTWIKKELING
ME. MADELEIN DU PLESSIS is die afgelope 18 maande die bestuurder van menslike hulpbronne by Monsanto. Sy het voorheen in die finansiële sektor gewerk en het ’n honneursgraad in bedryfsielkunde.
Haar verantwoordelikhede sluit die volledige werkgewer en werknemersiklus vir Afrika en Asië in – van die aanstellingsprosedure tot persoonlike ontwikkeling en salarisse. Sy werk ook nou saam met die transformasieprojekte en menseregtespan.
Die landbou is beslis anders as ander sektore, sê Madelein.
“Ek weet elke dag ek of iemand in ons bedryf gaan ’n groot impak en verskil in iemand anders se lewe maak. Die werk wat Monsanto se personeel doen, is nie vir eie gewin nie. Dit is opreg en word met die grootste geesdrif gedoen wat ek al gesien het. Ek werk met die talentvolste individue en dit is lekker om te sien hoe elkeen groei en saam met die maatskappy presteer.”
Dit is as’t ware ’n openbaring vir Madelein om deel te wees van die landbougemeenskap.
“Dis ’n omgewing waarin almal mekaar respekteer en bystaan, en waar tegnologie elke dag ’n rol speel. Elke dag is anders. Veral vir vroue is daar baie geleenthede vir groei en ontwikkeling.”
HANDELSMERK
“My pa het in die landbousektor gewerk en dit was vir my so mooi om te sien hoe gelukkig hy was en hoe hy sy liefdes kon uitleef. Ek wou sedert my kinderdae ook so wees,” sê ME. LANDI STOLTZ.
Sy is nou bykans ’n jaar lank Monsanto SuidAfrika se handelsmerkbestuurder. Sy is ’n gekwalifiseerde skakelbeampte en bemarker. Sy is verantwoordelik vir die bestuur en administrasie van Monsanto se bestaande handelsmerke, waaronder die ontwikkeling en verfyning van nuwe en bestaande handelsmerkkonsepte en bemarkingsplatforms. Dit sluit ook die skakeling met teikengroepe in en die bestuur van gedrukte en digitale bemarkingsveldtogte.
“Wat my opgewonde oor my werk maak, is om te sien hoe hierdie sektor uit sy nate bars, en hoeveel potensiaal vir groei en ontwikkeling hierin opgesluit lê.
“Ek is so trots daarop om te sien hoe vroue ’n verskil in die landbou en in hul gemeenskappe maak. Dit is vir my mooi om te sien hoe hulle die kwessies in die stad, op die plaas en in hul gemeenskap met soveel durf aanpak. Hulle kombineer en bemeester hul rolle as ma’s, beroepsvroue en vroue, en deins nie terug vir probleme nie. Dit laat my hart swel van trots om deel te wees van die landbou en om te ervaar hoe vroue se stemme gehoor word.
“Vroue moet hul harte volg. As jy werk waar jy al jou talente, geesdrif en potensiaal kan uitleef, is jy in die regte sektor. Wees altyd bereid om te leer en omring jou met mense wat ’n liefde vir die landbou het en meer as jy weet.”