Sukses met Santa Gertrudis
’n Skotse vrou het in Suid-Afrika kom trou, maar toe verloor sy haar hart op ’n beesras.
Me. Amy Williams het sowat 45 jaar gelede na SuidAfrika verhuis en saam met haar man, Donald, op die plaas Scotston in die Laeveld tussen Barberton en Nelspruit begin boer.
Hulle het aanvanklik met tabak en kommersiële beeste geboer – Donald het hom op die tabak toegespits en sy was verantwoordelik vir die beeste.
Die grootste gedeelte van hul kruisteelprogram het uit Brahman en North Devonbulle en een Santa Gertrudisbul bestaan. Die Santa Gertrudisbul se speenkalwers het hulle egter so beïndruk dat hulle hul eerste paar geregistreerde, vroulike Santa Gertrudisdiere in 1975 gekoop het.
VRIENDE EN FAMILIE
Amy se blootstelling aan beesboerdery kom van ver af. Haar voorgeslagte was eeue lank be trokke by beesteling, die afslaersbedryf en slaghuise in Skotland.
Aan die begin was ander Santa Gertrudistelers se aanmoediging vir Amy van onskatbare waarde. Sy het groot waardering vir mnre. Pip Hobson van Ladybrand, Koos Louwrens van Leandra en me. Annie Locke, wat onlangs op 92 oorlede is.
“Annie was ’n wonderlike mentor, veral omdat sy ook ’n vrou in die landbou was,” sê Amy.
Amy en Donald se seun, Ian, boer met makadamianeute en hul dogter, Janey, wat in Kaapstad woon, sien om na hul boeke en finansiële sake.
SKOUDIERE
Mnr. Albert Mathe, Amy se hoofbeeshanteerder, werk al amper 30 jaar saam met haar. Hulle skou sedert 1987 slegs op nasionale kampioenskappe.
“Ons het verskeie eerbewyse van die Landbounavorsingsraad (Elitekoeie) en van ons genootskap ontvang vir vrugbaarheid. Een van die hoofvoordele daarvan om te skou, is om die sterk en swak punte in jou kudde te vergelyk en te bepaal wanneer hulle saam met beeste van oor die hele land gesien word,” sê Amy.
Sy wil voortgaan om goed aangepaste, kommersiële bulle
aan die SuidAfrikaanse vleisbeesmark te verskaf.
“Om dit te bereik, moet jou hele kudde in soortgelyke toestande bestuur word, met soortgelyke bestuurspraktyke as dié van die mark wat hulle gaan betree,” sê sy.