BOTTER RAAK SKAARS

Internasionale botterpryse is op rekordvlakke. Botter het op die Global Dairytrade-veiling van 19 Julie bo VSA$ 6 000/ton verhandel – 70% hoër as in Januarie 2015.

“Laer voorraadvlakke van botter en kaas in die Europese Unie (EU) sal pryse verder versterk,” sê dr. Koos Coetzee, ekonoom van die Melkprodusente-organisasie (MPO).

“Die skerp styging in die botterprys is ’n gevolg van beide vraag- en aanbodfaktore. Verbruikers se opvattings oor

die gesondheidsvoordele van plantvette teenoor dierevette het verander namate wetenskaplike bewyse van die voordele van botter bekend geword het.

“In Suid-Afrika het verbruikers ook, danksy die Bantingbeweging wat prof. Tim Noakes so bekwaam bevorder het, en ’n groeiende vraag na natuurlike produkte van laevet- na volroommelkprodukte oorgeskakel,” sê Coetzee.

Plaaslike botterpryse het luidens ’n verslag van die Suid-Afrikaanse Melkprosesseerdersorganisasie (Sampro) in die 12 maande tot Maart vanjaar met 26,7% gestyg, hoewel die vraag met 4,4% gedaal het.

In die 24 maande tot Maart vanjaar het botter se prys met 38,2% gestyg.

Coetzee sê die groeiende vraag na volroommelk en -jogurt beteken daar is minder room vir die vervaardiging van botter beskikbaar.

Suid-Afrika produseer reeds gewoonlik nie genoeg bottervet vir plaaslike verbruik nie en is tradisioneel ’n invoerder van botter.

“Plaaslike produsentepryse moedig produsente nie aan om hoëvetmelk te produseer nie omdat die premie vir bottervet laag is vergeleke met die betaling vir vars melk.

“Plaaslike verwerkers moet gevolglik botter teen hoë pryse invoer.”