Klein begin, groot gewin
Doen waarvoor jy lief is en wees lief vir wat jy doen. Mnr. Loyiso Pepeta, eienaar van die plaas Copperfield by Kokstad in KwaZuluNatal, se lewe is op dié beginsel gegrond.
Die Copperfield-melkery het tot stand gekom na aanleiding van ’n droom wat mnr. Loyiso Pepeta (44) gehad het.
Dié droom is bewaarheid deur Ithala, ’n finansiering-en-ontwikkelingskorporasie in KwaZulu-Natal. Hy was vanjaar een van vier kategoriewenners in Ithala se eerbewyse vir sakepresteerders. Die eerbewys vir die Landboubesigheid van die Jaar is aan hom toegeken.
Copperfield verskaf melk, maas en jogurt aan supermarkte en groothandelaars in KwaZulu-Natal en die Oos-Kaap. ’n Fabriek word op die plaas gebou sodat hulle ook ghee (’n soort verhelderde botter oorspronklik uit Indië) kan vervaardig en melk kan steriliseer.
Pepeta se vrou, Liziwe, en mnr. Luyolo Makaula, sy oom, is mede-eienaars van die maatskappy Copperfield Farm, wat vyf jaar oud is en aan 40 mense werk verskaf. Die plaas het 810 ha grond waarop meer as 200 beeste wei.
SYFERS EN SKOLE
Pepeta is in Bizana in die OosKaap gebore. As ’n leerling aan die Junior Sekondêre Skool Ntabankulu het hy sy liefde vir syfers ontdek. Gevolglik het hy ekonomie as vak gekies en dit het later ’n groot rol in sy lewe gespeel.
Pepeta het aan die Tegniese Kollege Mthatha gematrikuleer en rekeningkunde aan die voormalige Port Elizabeth-technikon gestudeer. Hy het later die graad B.Tech. met rekeningkunde aan die Durbanse Universiteit van Tegnologie behaal.
“Ek het boerdery en om op die lande te wees nog altyd geniet. Hoewel ek universiteit toe gegaan en ’n kwalifikasie behaal het, wou ek nog altyd in die buitelug wees en nie in ’n kantoor vasgekeer nie. Ek is baie lief vir weiding en meganisasie, maar dit is lekker dat ek steeds my rekeningkundige vaardighede in die onderneming kan gebruik.”
ARBEID ADEL
Pepeta wou in ’n stadium sy BMW vir ’n Range Rover verruil, maar hy was bewus van die skuld wat hy dan sou moes aangaan. Toe besluit hy ’n trekker sal beter wees.
Pepeta is ’n voormalige hooffinansiële beampte van die plaaslike owerheid Ingquza Hill. Terwyl hy nog heeltyds gewerk het, het die trekker by sy huis in Bizana gestaan. Hy het op landelike gemeenskappe se grond gewerk, tot voordeel van trusts en koöperasies. Hy wou geld bymekaar maak om sy lening vinniger af te betaal.
“Wanneer ek van die werk af gekom het, het ek van 18:00 tot middernag op die lande gewerk om ’n inkomste te lewer en kapitaal op te bou om my eie plaas te koop.”
Dié pa van twee seuns en twee dogters staan elke dag om 04:00 op. Sy dagtake wissel van die opstel van afleweringsnotas, die nagaan van produksie en masjiene, tot die oorsig van die melkproses, die tel van voorraad en die afteken van aflewerings.
“As ’n entrepreneur het ek geleer om my nie te laat beïnvloed deur die druk wat ander mense op my plaas nie. Ek het geleer om groot druk te hanteer omdat alles van my afhang.”
Hy sê hy is ’n man met integriteit. “Wat ek ook al belowe om te doen, sal ek doen. As ek dit om die een of ander rede nie kan doen nie, sal ek jou laat weet.”
Uit sy jeugjare onthou hy dié wyse woorde: “Vind uit waarvoor jy lief is en werk hard om ’n sukses daarvan te maak.”