Ouma se resep saadjie vir nuwe plaasbesigheid
’n Oos-Kaapse boervrou het boerseep op groot skaal begin maak nadat sy die ou familieresep in joernale in haar man se kantoor ontdek het. Tracey Michau van die plaas Orange Grove by Cradock vertel meer.
Wie koop boerseep? Hoofsaaklik mense wat ’n veeldoelige, natuurlike produk sonder bymiddels wil hê. Boerseep is besonder goed vir mense met ’n sensitiewe vel, ekseem, psoriase en skilfers. Daar is niks op die mark wat wasgoed so goed skoon kry nie en dit kan selfs jou honde vlooi- en bosluisvry hou as jy dit gereeld gebruik om hulle te was. Hoe het jy die mark vir dié produk geïdentifiseer? Ek gebruik lap-babadoeke wat van natuurlike hennepvesel gemaak word. Boerseep word as die heel beste produk beskou om hulle mee te was, maar dis nie altyd maklik om boerseep in die hande te kry nie. Die vraag is groot en die meeste van my klante bestel aanlyn. Ons het vir ’n tyd lank ’n baie suksesvolle maandelikse boeremark op ons plaas gehou, waar ek besef het daar is ’n goeie vraag na boerseep. Dit was ’n ideale geleentheid om werk vir die vroue op die plaas te skep. Hoe pas die seep in by die res van jul boerdery? Orange Grove is hoofsaaklik ’n beesplaas. Ons bemark Beefmaster-kruiskalwers as speenkalwers en diere wat drie jaar lank op die plaas afgerond is. Dit is ’n skilderagtige en bergagtige plaas. Ons bied deur die jaar ook staptogte aan. Die seep is my belangstelling. Dis my missie om vir die plaaswerkervroue ’n werkgeleentheid te skep en vaardighede aan te leer.
Ons probeer om sover as moontlik self die groente, vrugte en vleis te verbou en te lewer wat ons eet.
Boerseep is ’n natuurlike, omgewingsvriendelike produk. Deur die vet ook te verwerk, kan ons nou die hele beeskarkas benut. Gebruik jy ’n tradisionele seeppot? Ja. Dis ’n reusepot van gietyster wat al geslagte lank op die plaas gebruik word. Vet van ons eie vrylopende beeste word daarin gebraai om uitgebraaide vet vir die seep te maak. My man, Toby, onthou goed hoe sy ma turksvystroop en vet vir boerseep daarin gemaak het. Waar het jy die resep gekry? Ek het in een van die joernale in my man se kantoor op die familieresep afgekom en in die begin van die jaar begin seep kook. Kan jy die resep vir lesers gee? Dis ’n baie eenvoudige kombinasie van drie bestanddele: Uitgebraaide vet, seepsoda en water. Die proses is egter ’n bietjie ingewikkelder. Jy moet beskermende klere dra en die hoeveelhede presies afmeet. Jy’t ook geduld nodig omdat die seep ’n maand moet staan voor dit gebruik kan word. Hoeveel seep vervaardig julle? Tans sowat 700 koekies seep per maand. Ek hoop die seepbesigheid ontpop sodat dit kan help om my jare lange droom te vervul om knoffel te begin plant. Dieselfde span vroue wat help seep maak, kan dan hopelik in die plant- en oestyd ingespan word vir die oes van knoffel, wat intensiewe arbeid verg. Wat maak jou boerseep anders as ander seepprodukte? Ons seep word in klein hoeveelhede op ’n slag gemaak en bevat geen preserveermiddels of moontlike giftige stowwe nie. Dit is 100% veilig vir babas en troeteldiere. Die meeste van die bestanddele kom van ons plaas af. Dit bevat ook geen wasmiddels wat die vel van sy natuurlike olies stroop nie. NAVRAE: http://orangegrovekaroo.wixsite. com/karoo/boerseep