Strydfonds kom teen eiendomsvergrype
AGRI SA is oorgehaal om enige onregmatige aanslag op die besit van landbougrond, die omgewing en die Grondwet in die howe te beveg. Om dié doelwit te bereik sal ’n artikel 21-maatskappy gestig en afsonderlik geadministreer word.
Die mikpunt is om minstens R38 miljoen vir toekomstige regsgedinge in te samel, het mnr. Ernest Pringle, voorsitter van Agri SA se landbou-ontwikkelingskomitee, op Agri Oos-Kaap se kongres bekend gemaak.
Pringle sê die insameling van geld sal nie net tot boere beperk wees nie, maar van alle instellings afkomstig wees, waaronder banke en die buiteland.
Mnr. Omri van Zyl, uitvoerende direkteur van Agri SA, het by verdere navraag gesê die toekomstige regsgedinge gaan oor grondwaardasies, grondplafonne en onteiening, asook wyer kwessies, soos skaliegas-ontginning en waterregte.
Agri SA sal ander organisasies binne die georganiseerde landbou en ook in die res van die burgerlike samelewing daarby wil betrek en hande vat oor kwessies van gemeenskaplike belang.
Hy sê Agri SA het reeds voorheen met ander organisasies, soos die Wêreldnatuurfonds (WWF), saamgewerk.
“Ons beoog hierdie onderneming nie net in belang van die landbou nie, maar die hele SuidAfrika. As die landbou vou, vou die breër ekonomie ook. Ons wil graag die hele burgerlike samelewing in die proses mobiliseer. Regsgedinge is duur, maar as ’n miljoen mense elkeen R100 gee, het jy skielik R100 miljoen beskikbaar.”
ALMAL SE REGTE
Die aankondiging is met groot geesdrif begroet en een van die afgevaardigdes, mnr. David Kock van Lady Grey, het voorgestel dat elke landbouvereniging van Agri Oos-Kaap R50 000 bydra. Met meer as 100 takke, sal die provinsie se bydrae sowat R5 miljoen beloop, het hy gesê.
Pringle het benadruk dat enige wetgewing wat die omgewing nadelig raak, met die ingesamelde geld in die howe beveg sal word.
“Die ironie is dat die staat jou en my geld (belastinggeld) gebruik om ons te ondermyn.
“Op die ou end is dit nie net die regte van boere wat ter sprake is nie, maar die regte van alle landsburgers wat eiendom besit. Dit is egter duidelik dat gewone landsburgers besig is om op te staan vir hul regte en ’n streep in die sand te trek.”
WATERKWESSIE BEKYK
Op dieselfde kongres het mnr. Wayman Kritzinger, adjunkvoorsitter van Agri Oos-Kaap, gesê waterbesoedeling – waar munisipaliteite weens swak rioolbestuur die grootste sondaars is – het reeds in so ’n mate toegeneem dat dit voedselsekerheid in gedrang bring en ’n gesondheidsgevaar vir mense inhou.
“Agri SA het reeds ’n regsmening ingewin oor die Departement van Water en Sanitasie se grondwetlike plig om dié kosbare hulpbron te beskerm en oor besproeiingsboere se regte teen moontlike aanspreeklikheid kragtens die Wet op Verbruikersbeskerming (Wet 68 van 2008).”
‘Regsgedinge is duur, maar as ’n miljoen mense elkeen R100 gee, het jy skielik R100 miljoen beskikbaar.’