20 ton-kompetisie (suid)
Vanjaar se wenner in die suidelike streek van Cradock Saadverspreiders se 20 ton klub-mieliekompetisie spog met ’n oes van 23,05 ton per hektaar.
Met ’n opbrengs wat net ’n klein bietjie kleiner is as die nasionale rekord, stap mnr. Wouter Heyns vanjaar vir die tweede keer met die wenprys weg in Cradock Saadverspreiders se 20 ton-klub-mieliekompetisie.
Wouter boer op die plaas Uplands net buite Cradock. Hy was in 2014 ook die wenner met ’n opbrengs van 19,91 ton/ha. Met dieselfde kultivar is sy opbrengs vanjaar 23,05 t/ha. Dit is net effens minder as die nasionale rekord van 23,92 t/ha wat verlede jaar deur mnr. Erich Cloete van die plaas Sanctuary in die distrik Cradock opgestel is.
Die naaswenner is mnr. Zirk Scheepers van die plaas Wonderkop by Cradock, wat 22,98 t/ha geoes het. Scheepers was drie
jaar gelede die algehele wenner met ’n opbrengs van 22,5 t/ha.
GEMENGDE BOERDERY
Wouter boer met Merino’s, beeste, lusern, mielies en aangeplante weidings. Hy volg ’n vyfjaarsiklus vir sy vee waarin hy elke vier jaar die lande sny. Hy laat die vee vir ’n jaar op die lusernlande wei en beplant dan die helfte van die land met mielies.
Op die swakker lusernlande plant hy weidings vir die kleinvee. Wouter sny ongeveer 22 ton lusern in ’n snyseisoen. Sardi 7 is een van sy gunstelingkultivars.
Wat bemesting betref, gebruik hy hoendermis, kalk en gips. Naoes werk hy die mieliereste in die grond in om die koolstofgehalte te verbeter.
Wouter se wenresep is om mikro-elemente tydens planttyd toe te dien. Hy glo jy kan met minder kunsmis wegkom, maar dat mikro-elemente noodsaaklik
tydens planttyd is. Waar dit nie moontlik met planttyd is nie, is saadbehandeling of spilpunttoediening die alternatief.
Wouter gebruik Metson se mikro-elementeproduk wat spesifiek vir die Visriviervallei geformuleer is en deur Cradock Saad bemark word.
Wouter gebruik die swart fosfaatmengsel, Black Turbograin, met mikro-elemente met planttyd. Vir topbemesting gebruik hy ’n mengsel met stikstof, kalium en swael van Cradock Saad.
VOGBESTUUR
Wouter se besproeiingsaksies behels vloedakkers en spilpunte. ’n Vloedakker was juis die land wat hom die kompetisie laat wen het.
Sy ondervinding is dat ’n vloedakker wat reg bewerk word, en waar die watertoediening reg bestuur word, nie vir ’n spilpunt hoef terug te staan nie.
Wouter het vanjaar sukses behaal met die kortgroeitydbaster DKC 62-80 BR van Monsanto, waarmee hy 23,05 ton/ha van die land geoes het.
Die stapelgeen vergemaklik sy onkruidspuitprogram met die RoundUp-opsie, veral in die besige tyd wanneer dit oorvleuel met die sny van lusern, saam met die gemoedsrus wat dit teen stronkboorders bied.
Vir gesonder plante en verbeterde opbrengs is Abacus (reg.nr. L8048, Wet 36 van 1947) ook deel van sy spuitprogram.
WENNERS
Mnr. Dirk Visser, eienaar van Cradock Saad, het op die oorhandigingsgeleentheid op 24 Junie gesê sedert die kompetisie vier jaar gelede ingestel is, het dit ’n groot bydrae gelewer om beter opbrengste te behaal.
“Deelnemende boere het hul grond- en boerderypraktyke aangepas om ’n volhoubare boerdery van hoë opbrengste met die minimum insette te verkry.”
Die twee streekwenners het elk R40 000 gewen en die naaswenners R20 000.
Visser sê die prestasie is in ’n moeilike produksiejaar behaal omdat die hitte-eenhede hoog en dit ook baie droog was, met reën wat eers laat in Januarie en Februarie uitgesak het.
Die mieliekompetisie word volgende jaar die laaste keer aangebied.
NAVRAE: DirkVisser, sel 082 550 4499; e-pos: cradocksaad1@isat.co.za.