Dié week in die landbou
LAASTE KEER?
Mnr. Johannes Möller, voorsitter van Agri SA, het op die jaarlikse kongres van Agri Oos-Kaap gesê dit was sy laaste verskyning op dié kongres. Toe Landbouweekblad hom later vra of dit beteken hy gaan nie weer staan vir die voorsitterskap nie, het hy instemmend geknik. Mnr. Omri van Zyl, uitvoerende direkteur, het egter gesê hy sal nog met Möller diep gesprekke voer om hom te oorreed om sy besluit te heroorweeg.
AKTEVERSNELLING
Die Kabinet het die wysigingswetsontwerp op akteregisters goedgekeur om vir openbare kommentaar gepubliseer te word. Dié wysiging van die Wet op Akteregisters (Wet 47 van 1937) moet administrasieprosesse rondom die registrasie van aktes verbeter. Dit baan ook die weg vir aktes om in elektroniese formaat gehanteer te word. Jaarliks hanteer die aktekantoor nagenoeg ’n miljoen eiendomsregistrasies. Dit geskied tans nog met die hand. ’n Elektroniese stelsel behoort grondbestuur akkurater te maak en akteregistrasies te versnel.
DIE WIEL DRAAI STADIG
Politieke uitsprake sal nie noodwendig gou in die praktyk toepassings vind nie, sê me. Annette Steyn, DAskaduminister vir landbou. “Boere behoort dus nie té bekommerd te raak as opportunistiese politici sê daar gaan op hul grond geplak word nie. Dit gaan nie ’n maklike proses wees om aan die Grondwet te peuter nie. Buitendien het die regbank by meer as een geleentheid met uitsprake getoon hoe hoog regters die land se Grondwet aanslaan. Hulle sal dit beskerm,” het sy op Agri Oos-Kaap se jaarlikse kongres gesê. Lees ook bl. 14 en bl. 23.
STUIT BRUCELLOSE
Met die enttyd wat eersdaags aanbreek, doen die Herkouerveterinêre Vereniging van Suid-Afrika (RuVASA) ’n beroep op boere om erns te maak met brucellose-inentings. Ent kalwers tussen 4 en 8 maande slegs een keer in met stam 19. As S19 nie beskikbaar is nie, kan RB51 gebruik word. Ent koeie en kalwers ouer as 8 maande net met RB51 in. Moenie dragtige koeie inent nie, want hulle sal aborteer. Daar is geen behandeling vir dié siekte by beeste nie en dit kan jou hele kudde besmet.
HAELBESKERMING
Die uitvoermaatskappy South African Fruit Exporters (SAFE) is besig om 109 ha suurlemoene en nartjies op sy grootste plaas by Marble Hall in Limpopo onder skadunette te sit
(foto bo). Dit kom nadat hael die afgelope paar jaar miljoene rande skade aan sitrusboorde in dié omgewing aangerig het. Die maatskappy beoog om volgende jaar 70 ha Witkrans-nawels ook só te beskerm. Mnr. Frans Vorsatz, plaasbestuurder, het aan Fresh Plaza gesê hulle wil die hele plaas se aanplantings — 493 ha — onder skadunette sit.
NAMIBIESE GENOTE
maatskappy Pupkewitz Holdings het ’n aandeel van 50% in Kaap Agri se Namibiese filiaal gekoop. Kaap Agri sê in ’n verklaring op die JSE-nuusdiens die doel van die transaksie is om hom ’n meer omvattende teenwoordigheid te gee. “Die gekombineerde inklusiewe aanbod van Pupkewitz Megabuild en Kaap Agri Namibia sal alle kleinhandel-, landbou- en kontrakteursklante in Namibië bedien deur die produk- en diensaanbod te kombineer en te verbeter.”