Fynbos gee skop aan nuwe drankies
Bekende wynmakers maak nou opwindende drankies met fynbos en gee daarmee erkenning aan die hoogs bedreigde suurpootjieskilpad.
Toe Jean-Baptiste Cristini – of Tista, soos mense hom ken – ná ’n dekade in die Franse wynlande terugkeer na die Wes-Kaap, wou hy ’n produk maak wat dié besondere gebied weerspieël.
Saam met die bekende wynmakers Andrea en Chris Mullineux van Mullineux & Leeu Family Wines, het hy die Geometric Drinks-maatskappy begin en ywerig begin eksperimenteer met inheemse Kaapse plantegroei. Die resultaat is elegant verpakte tonikums (’n nuutjie in Suid-Afrika) in drie geure – blomagtig, sitrus en spesery – en ’n jenewer met sagte fynbosgeure.
“Ons is ’n botaniese maatskappy,” sê Tista oor die plantsoorte, soos boegoe en roosmalva, waarmee hul produkte gegeur word.
Die Symmetry Tonics, gemaak van kinien-ekstrak, is in konsentraatvorm. Die plantolies sorg vir genoeg geur dat dit onnodig is om baie suiker by te voeg, dus het dit minder as ’n kwart van die suikerinhoud van gewone tonikums. ’n Sopie daarvan is heerlik saam met sodawater en jenewer, maar jy kan dit ook as ’n nie-alkoholiese drankie bedien.
Die Geometric Gin bevat, naas jenewerbessie (wat nog nie plaaslik verbou word nie), ekstrak van nege inheemse plante.
Die plante word wild geoes, soos in die Swartland, waar baie van die Mullineux’s se druiwe op die plaas Roundstone, naby Riebeek-Kasteel, verbou word. Hulle plant ook groot stukke fynbos tussen die wingerde aan.
Die jenewer word in eg Kaapse styl van druifspiritus, en nie met ’n graan- of suikerrietbasis nie, gemaak. “Ons maak dit tans met Chenin blanc en Colombar, maar wil ook in die toekoms Sauvignon blanc gebruik.”
Die naam verwys na ’n baie spesiale inwoner van die WesKaap, die kritiek bedreigde suurpootjieskilpad (geometric tortoise), sê Tista. “Dit verwys ook na struktuur, waarvan ons hou, maar die suurpootjieskilpad lê ons na aan die hart. Ons sien dit as ’n simbool van volhoubaarheid in die Wes-Kaap. Daar is minder as 800 van dié skilpaaie in die wêreld oor. Voor enige wingerd op Roundstone geplant word, maak Chris-hulle doodseker daar is nie suurpootjies op die grond nie.”