93 Op reis (Boeke)
Reis kan vir verskillende mense verskillende dinge beteken. Dié boeke neem rusbankreisigers op kopreise, sielsreise en reise na gister.
GISTER SE SPORE
The historical Overberg deur Chris Schoeman. Uitgewer: Zebra Press. Prys: R285 Die Overberg, bekend om saaien veeboerdery, pragtige kusdorpies, berge en ongerepte plantegroei, het sy naam te danke aan die Hollanders (“Over’t Berg”) en die ligging van Kaapstad af. Dit strek tussen die Hottentotshollandberge en die Breërivier, en het ’n lang en ryk geskiedenis.
Chris Schoeman se boek is ’n omvattende en fassinerende werk oor selfs die kleinste plekkies, soos Baardskeerdersbos, Houwhoek en Bettiesbaai.
Dis toegelig met pragtige kaarte en historiese en meer onlangse foto’s oor die argitektuur, die plantegroei en die landskap.
Lees byvoorbeeld oor die walvisjagbedryf aan die suidpunt van Afrika, bekende skeepstragedies, soos die Birkenhead en die Arniston, en die omgewing se sendingstasies en karakters (mense soos Jan Rabie, die Barry-familie en Gregoire Boonzaier). Daar is selfs ’n foto van die oorspronklike beheerde atmosfeer-opbergingsgerief vir appels wat in 1935 in Elgin opgerig is.
Dis ’n mooi boek, maar nie een wat net op jou koffietafel gaan bly lê nie. Dié een sal gelees word.
MONUMENTSOEKERS
Oor berge en dale deur Jackie Grobler. Uitgewer: Jonathan Ball Uitgewers. Prys: R285 As Jackie Grobler en sy vrou, Elize, iewers heen ry, weet sy nie watter afdraaipaaie wag of watter hardnekkige draadhekke sy sal moet oopmaak nie. Sien, Elize is met ’n monumentjagter getroud –’n geskiedkundige wat oor jare heen kruis en dwars deur Suid-Afrika gereis het om gedenkplekke op te spoor.
Soos hy self sê: Daar is nie ’n plaasdraad te hoog, grondpad te sinkplaat of aanwysings te gebrekkig om hulle te keer nie. Want, “vir ’n monumentjagter het ’n ou begraafplaas net soveel aantrekkingskrag soos ’n goeie slaghuis vir ’n gretige braaier”.
Terwyl Jackie foto’s neem van nederige grafstene of swierige monumente, skryf Elize koördinate neer. Dan begin die raaispeletjies tot die geheime van mense, soos Aia Jana van Kranskop, die Voortrekkers van ouds, oorlogshelde en staatsmanne, struggle-helde en bekende skrywers, ontsyfer word.
Die boek vertel die verhale van bekendes en onbekendes – die snaakse staaltjies, tragedies en liefdesverklarings wat hulle meer as net name in geskiedenisboeke maak.