‘KOM ONS ONDERSTEUN MEKAAR’

Ek het onlangs aan u geskryf (“Staan saam teen kernkragprojek”, LBW, 12 Mei 2017) na aanleiding van ’n stelling deur ’n boer dat Suid-Afrika se rommelstatus dalk ’n bedekte seën is, aangesien die land nie die kernkragprojek sal kan bekostig nie.

Ek het daarop gewys dat die konkelaars net ’n ander bron sou vind en dat die staatsdienspensioenfonds (GEPF) die nuwe teiken vir die finansiering van hierdie onbekostigbare, en mag ek sê, Gupta-projek is. Ek het ’n beroep om ondersteuning vir my klein groep, die GEPF-moniteringsgroep, teen dié bedreiging gedoen en gevra dat mense moet saamstaan teen korrupsie en hierdie soort bedreiging van ons belange.

Sedertdien het verskeie aanslae op die fonds gevolg. As die Regering dit nie wil gebruik vir kernkrag nie, is dit vir tersiêre onderwys (ná die Fees Must Fall-veldtog) of die vele swak bestuurde staatsinstellings, soos die SAA, Eskom en Transnet, wat deur ons pensioenfonds staande gehou word. Selfs die Land Bank word deur ons pensioenfonds ondersteun.

Toe ek laas gekyk het, was R10 miljard van ons geld daar. Ek hoop dit is nog daar!

Weet boere van hierdie probleem? Ons kan u heelwat meer daarvan vertel as u belang stel.

Ek praat dikwels op die radio en het op 31 Mei op Andries van Zyl se program Geldsake op RSG saam met Hein Kruger van Hein Kruger Internasionaal deelgeneem aan ’n gesprek oor die wangebruik van ons pensioenfonds se geld.

Ek het toevallig daardie oggend iewers verneem dat net 5% van die geld wat vir droogtehulp aan boere bewillig is, hulle bereik het – blykbaar weens korrupsie. Die versoeking was te groot om te weerstaan en ek het dit sommer, miskien buite konteks, ingegooi.

Ek hoop die boere het gehoor hoe ons hulle ondersteun. A.P. STEMMET