VOËLGRIEP TREF RCL
HOOGS aansteeklike voëlgriep het onlangs ook op een van die voedselgroep RCL se plase uitgebreek.
In ’n verklaring sê RCL die virus is by een van 18 skure op die groep se plaas Viva, naby Muldersdrif in Gauteng, bevestig. Viva is ’n relatief klein teelplaas met sowat 67 000 hoenders. Die plaas is onder kwarantyn geplaas en al die hoenders word van kant gemaak om die verspreiding van die siekte te voorkom.
RCL se naaste ander geriewe is sowat 30 km ver.
Die hoenders op Viva word nie vir vleisproduksie gebruik nie, en omdat die betrokke hoenders teen die einde van hul lewensiklus was, sal voorsiening aan die mark volgens RCL nie geraak word nie.
Mnr. Scott Pitman, besturende direkteur van RCL Foods se verbruikersafdeling, sê die uitbreking het voorgekom “ondanks obsessiewe en streng biosekerheidsmaatreëls”. Hy sê RCL gee sy volle samewerking aan die Regering en ander owerhede vir die insameling van inligting oor die beste maniere om die siekte te bekamp.
Volgens RCL het die Departement van Landbou, Bosbou en Visserye reeds 11 uitbre kings bevestig.
’n Dag voor RCL se verklaring het die SuidAfrikaanse Pluimveevereniging (SAPV) gesê daar was toe reeds vyf uitbrekings in vyf weke op kommersiële plase.
Die hoenders wat daardeur geraak is, is steeds ’n klein persentasie van die totale nasionale bevolking en die uitbrekings het dus volgens die organisasie ’n baie beperkte impak op die voorsiening van pluimveeprodukte.
SuidAfrika het volgens die SAPV verlede jaar sowat 1 miljard braaihoenders verskaf en sy 24 miljoen lêhenne het sowat 8 miljard eiers gelê.