Lesotho-grensaanvalle: Polisie praat met boere
LT.-GENL. LEBEOANA TSUMANE, kommissaris van polisie in die Vrystaat, sou rondom druktyd (10 Augustus) vergader met grensboere in die Clocolan-omgewing wat die afgelope tyd deurloop onder oorgrensmisdaad uit Lesotho.
Die doel van die vergadering, wat deur Tsumane belê is, is om eerstehands van die 19 grensboere by Clocolan se probleme te verneem en oplossings te bespreek. ’n Afvaardiging van Vrystaat Landbou (VL) sal ook binnekort die grensgebied besoek.
Die voortslepende frustrasie oor onvoldoende grensbeveiliging tussen die Vrystaat en Lesotho en ’n vreespsigose onder gemeenskappe weens toenemende oorgrensaanvalle op plase is van die faktore wat landelike veiligheid in die Vrystaat bedreig.
Op verskeie plekke langs die Caledonrivier is die watervlak so laag dat daggasmokkelaars en veediewe droogvoets die grens kan oorsteek. Die Lesothogrenssituasie is ’n kruitvat, veral ná die vyfde plaasaanval vanjaar onlangs in die distrik Clocolan.
Die dringendste versoek van grensboere is dat die patrolliepad aan die Vrystaatse kant van die grens herstel word om behoorlike patrollies deur die diensdoenende weermageenheid moontlik te maak.
Mnr. Hennie Swanepoel, wat sowat 1 km van die grens woon, sê almal langs die grens is tans paraat en enige verdagte optrede word as ernstig beskou.
’n Groep van ses mans het op 1 Augustus die Caledonrivier oorgesteek en tydens hulle plun- dertog vir hulself kos gemaak in die huis van mnr. Johan Botha en sy vrou, Lientjie. Die groep het op Botha se plaas, Bolitho, toegeslaan onder die voorwendsel dat hulle melk wou koop.
Botha se werkers is met pistole aangehou en saam met twee huiswerkers vasgebind terwyl Botha mielies dorp toe aangery het.
Die rowers het later hul buit met ’n trekker en wa tot by die rivier gebring en die veld aan die brand gesteek voordat hulle na Lesotho gevlug het. ’n Voertuig het hulle aan die oorkant van die rivier in- gewag. Die plaasopstal is sowat 600 m van die rivier af.
Mnr. Deonne Roux, koördineerder van landelike veiligheid in die distrik, sê die aanvalle het ’n slegte sielkundige uitwerking op die gebied se inwoners.
“Kan jy jou indink wat slagoffers ervaar wanneer hulle vasgebind is en hulle moet toegee aan die eise van rowers wat geld en wapens soek?” vra hy. “En kan jy jou indink wat ouers ervaar as die aanvallers begin om die poniesterte van hul dogtertjie met ’n mes af te sny?”