WEIDINGSTOESTANDE GROOTLIKS BENARD

WATER is besig om op te droog, weiding is in ’n slegte toestand, vee vrek en voer moet ten duurste aangekoop word in drie provinsies wat nog in die wurggreep van die droogte vasgevang is.

Uit ’n landwye opname van Landbouweekblad die afgelope weke blyk dit die enigste provinsies waar daar nié erge kommer oor weidingstoestande heers nie, is Gauteng en Noordwes.

In die OosKaap is die weidingstoestande veral by Whittlesea en Ntabathemba baie sleg, maar volgens dr. Amie Aucamp, bestuurder van die OosKaapse Rooivleisprodusenteorganisasie (RPO), is die situasie van die kus tot by die eskarp van die Amatola, Winter en Sneeuberg kritiek. Landbouweekblad is in besit van dokumente wat aandui dat die distriksmunisipaliteit Sarah Baartman in die OosKaap van plan is om sy gebied tot ’n rampdroogtegebied te verklaar.

Die provinsiale departement van water en sanitasie het geen geld vir droogtehulp beskikbaar nie, en ook geen geld vir onvoorsiene uitgawes nie.

TEKORTE

In die NoordKaap is die situasie ook benard. Mnr. Dirk Krapohl, bedryfsbestuurder van die RPO in die NoordKaap, sê die oos

telike dele – van Calvinia en Brandvlei tot by Williston en die Boesmanland – het die hele jaar minder as 50 mm reën gehad. Verder sukkel abattoirs om lammers uit die distrik te kry. Pryse het sowat twee weke gelede by R81/kg vir wollammers gedraai, wat dui op ’n groot tekort.

In die somer en winterreëngebiede in Namakwaland is veldtoestande swak en dit versleg vinnig verder.

Weiding en voer is ook in die WesKaap steeds ’n krisis. Mnr. Carl Opperman, uitvoerende hoof van Agri WesKaap, sê hulle help al sedert November 2015 boere in die provinsie se twee rampgebiede, die Weskus en SentraalKaroo, met droogtehulp. Die probleem is egter dat al hoe meer gebiede in die moei likheid raak, veral in die distrik Eden waar brande vroeër vanjaar weiding totaal vernietig het.

WISSELVALLIG

In die Vrystaat wissel toestande van normaal tot swak. Buiten kommer oor veldbrande is die voedingswaarde van weiding in baie gebiede onvoldoende en vooruitsigte vir groenvoer in die lente is ook nie goed nie.

Limpopo ervaar ook gemengde weidingstoestande. Vooruitsigte hang grootliks af van hoe vinnig die reëntyd begin. In Mpumalanga benut kommersiële boere tans oesreste, maar daar is groot kommer in die opkomende sektor waar daar weens swak weidingsbestuur nie voldoende voorsiening is vir die winter nie.