PINOTAGE WORD GROOT
DIE gehalte en prys van wyn van Pinotage, Suid-Afrika se eie inheemse druifsoort, verseker dit is lank nie meer net ’n alledaagse drinkwyn nie, maar word deesdae as ’n gerekende wêreldspeler beskou. Mnr. Beyers Truter, voorsitter van die Pinotage-assosiasie, het by die aankondiging van die 21ste Absa Top 10-kompetisie gesê dié kultivar het die afgelope 21 jaar merkbaar verbeter.
Verkope het die afgelope paar jaar met 73% gestyg en toon plaaslik én internasionaal belowende vordering. Verder het Pinotage al drie keer internasionale wynmaker van die jaar-trofeë op die internasionale wyn- en spiritualieëkompetisie in Londen opgelewer.
“Pinotage is nie meer die Aspoestertjie nie, maar dit het gevorder van geroeste spykers, soos Britse wynskrywers dit eens genoem het, na rooi goud en die troefkaart van die bedryf,” het hy op die bekendmaking van die Absa Top 10 op Stellenbosch gesê.
Pinotage het ontstaan uit ’n kruising van Pinot noir en Hermitage (Cinsaut).
GEMEENSKAPPE BAAT
Saam met die wyne se gehalte het die pryse ook gestyg.
“Nie lank gelede nie het Pinotage altyd aan die laer kant van die prysspektrum gelê. Daar was ’n persepsie dat goedkoop wyn se gehalte nie goed is nie. Danksy verskeie bemarking s pogings hou Pinotage se prys nou kers vas by die bestes in Suid-Afrika en oorsee.” Truter sê dié ontwikkelings het daartoe bygedra dat boere meer vir Pinotage-druiwe betaal word en plaaswerkers se lone ook kon styg.
Mnr. John Tshabalala, Absa se uitvoerende hoof in die Wes-Kaap, het die bedryf aangemoedig om bates en hulpbronne te gebruik om gemeenskappe te ontwikkel.
“Wanneer die gemeenskappe gedy waarin ons woon en werk, gedy ons ook. En wanneer die samelewing gedy, gedy almal.”
Truter het Pinotage-wynmakers aangeraai om aan te hou vernuwend wees en sê die wynmakers is “nou regtig in pas met hul terroir”.
’n Pinotage-klassifikasie stelsel– ’n eerste ter wêreld – is moontlik ook op pad, sê hy.
WENNERS
’n Nuwe museumklas-kategorie het op vanjaar se Top 10-kompetisie die lig gesien. Dit is vir Pinotage-wyne ouer as tien jaar, wat ingestel is om dié kultivar se verouderingspotensiaal te toon. Neil Ellis Vineyard Selection Jonkershoek Pinotage 2007 het dié kategorie gewen.
“Pinotage verander met tyd. Dit raak glad en gebalanseerd en ek glo wêreldwyd gaan museumklas Pinotages ’n groot kategorie raak,” sê Truter.
Uit die 147 Pinotages wat meegeding het, was bykans die helfte afkomstig uit Stellenbosch.
Kanonkop-landgoed teen die Simonsberg in Stellenbosch het geskiedenis gemaak deur vir die twaalfde keer ’n wyn – sy Pinotage 2012 – onder die beste tien te hê. Die ander wenners was: Delheim Pinotage 2012, Diemersfontein Carpe Diem Reserve 2015, Flagstone Writer’s Block Single Vineyard Pinotage 2015, Lanzerac Pionier Pinotage 2014, Môreson MKM 2015, Neil Ellis Bottelary Hills Pinotage 2015, Stellenbosch Vineyards Bushvine Pinotage 2015, La Cave Pinotage 2016 en Windmeul Pinotage Reserve 2015.