GESONDE KUDDES IS DIE BESTE VERWEER TEEN DIARREE-VREKTES
’N STERK immuunstelsel is die beste verweer teen kriptosporidiose, en indien die siekte wel onder jou diere uitbreek, is vinnige optrede deurslaggewend.
Dít is die raad van dr. Liezel Wasserman, veearts van die Clocolan-dierekliniek.
Die bekendste simptoom van kriptosporidiose is geel of grys diarree by lammers en kalfies van ongeveer een tot drie weke oud.
“Diere moet gereeld mineraalen vitamienaanvullings kry, terwyl seleen ook ’n belangrike rol speel,” sê sy. “In gevalle waar diere wel siek word, is dit dan makliker om hulle te behandel en daar is veel minder vrektes.
“Waar boere simptome opmerk, is dit gewoonlik Crypto
sporidium saam met Escherichia coli. Siek lammers en kalfies moet dadelik saam met hul ma afgesonder word, aangesien die siekte hoogs aansteeklik is.”
Boere moet ook diere teen ontwatering behandel deur elektroliete by water, melk of poeiermelk te meng. “Die kalf of lam moet sowat 10% van sy liggaamsgewig per dag inneem vir onderhoud,” sê Wasserman.
Antibiotika om die siekte te behandel, mag slegs met die samewerking van ’n veearts gebruik word. ’n Antibiogram moet gedoen word om die regte antibiotika vir die toestand te identifiseer. “Sekere antibiotika werk beter op sekere plase as op ander. Daarom kan daar nie net goedsmoeds antibiotika voorgeskryf word nie.”
KALFBEHEER
Vir intensiewe boerderytoestande stel prof. David Smith van die Universiteit Nebraska-Lincoln in Amerika die Sandhills-kalfstelsel voor. Die stelsel voorkom die verspreiding van diarree deur kalwers volgens ouderdom te verdeel en deur die geskeduleerde verskuiwing van dragtige koeie na verskillende kampe om die patogeenlading in verskillende kampe te verminder.
Die uiteinde van dié stelsel is dat koeie kalf in ’n kamp wat ’n paar maande lank sonder vee was, en ouer kalwers kan nie jonger kalwers met E. coli of kriptosporidiose aansteek nie.
’n Volledige uiteensetting van dié stelsel verskyn in Landbou Vee wat van einde Augustus te koop is.
‘Siek lammers en kalfies moet dadelik saam met hul ma afgesonder word, aangesien die siekte hoogs aansteeklik is.’