RIOOLWATER BEDREIG DRUIWE-UITVOER
BESORGDE boere van die Benede-Oranjerivier hou die gehalte van die besproeiingswater met kommer dop uit vrees dat die gebied se tafeldruif-uitvoer in die gedrang kan kom.
Die Benede-Oranjerivier is vir sy produksie van uitvoerdruiwe bekend wat vanaf Oktober tot Januarie gelewer word en buitelandse inkomste van miljoene rand verdien.
Die probleem van onbehandelde rioolwater wat by Upington in die Oranjerivier gestort word, is onlangs op die spits gedryf ná hernude klagtes van die Lemoendraai-gemeenskap wat naby die dorp se rioolaanleg geleë is.
’n Boer wat gevra het om anoniem te bly, sê klagtes oor rioolstorting is reeds sedert 2011 ontvang. Die dorp se rioolstelsel het na bewering nie die nodige vermoë om in spitstye riool na die aanleg te vervoer nie.
Dit bring mee dat toevoerpype voor die aanleg oorlaai word en onbehandelde riool by mangate uitborrel, waarna dit in die besproeiingskanale en uiteindelik in die Oranjerivier beland.
Watermonsters wat maandeliks stroomaf by Kanoneiland geneem word, toon ’n duidelike afname in die watergehalte teenoor dié wat stroomop van die dorp by die kampus van die Akademie vir Omgewingsleierskap (AEL) geneem word.
Mnr. Wiaan van Rensburg, voorsitter van die Oranjerivierlandbouunie, sê die kwessie van watergehalte is ’n plofbare onderwerp, aangesien die inkomste van die streek se vrugteuitvoerbedryf daarvan afhang. Indien invoerders strenger gesondheidsvereistes stel, kan dit meebring dat bestellings gekanselleer word. Hy sê boere vrees dat hul druiwe ’n ongunstige beeld verkry.