Meer trekkers vir Noordwes!
Action Agri, die nuwe landbouvertakking van die Actionmotorgroep, bied nou Argo Industrial se volledige reeks dienste en produkte aan boere op Lichtenburg en Zeerust.
Action Agri, ’n lid van die Argo Industrial-handelaarsnetwerk, is oorgehaal om trekkers, werktuie en landboutoerusting van bekende handelsmerke, soos Landini en McCormick, te verkoop. “Ons wil die landbou in Noordwes met die regte trekkers en werktuie ondersteun. Omdat Action Ford nou sy Action Agri-takke op Lichtenburg en Zeerust oopgemaak het, het ons ’n beter platform van waar ons boere kan bedien,” sê mnr. Callie Human, nasionale verkoopsbestuurder by Argo Industrial.
Die Action Agri-takke lewer ook onderhoudsdiens, herstelwerk, onderdele en gebruiksartikels vir dié reekse trekkers en werktuie, soos spuite, strooiers en hooibalers.
Mnr. Paul Vorster, voorsitter van die Action Groep, sê: “Ons wou nouer by die landbousektor betrokke raak. Dit maak sin dat ons boere wat by ons ’n bakkie koop, ook met trekkers en werktuie van goeie gehalte kan help. Action Agri doen al 18 maande lank sake in Noordwes en met so ’n goeie seisoen agter die rug is ons hier om te bly.”
KIES EN KEUR
Vir menige boer is die kleur van sy trekker byna net so belangrik as die tegniese spesifikasies. Dit ís darem maar mooi as jou vloot rooi of blou trekkers saam op die lande werk of ná ’n dag se harde werk blink gewas in die skuur staan. Gelukkig hoef die keuse van kleur glad nie inbreuk te maak op gehalte of betroubaarheid nie.
Die verskillende reekse in McCormick en Ladini se handelsmerke bied ’n wye verskeidenheid in krag, funksies en luukses, en pas dus aan by bykans enige boer se begroting en spesifikasies vir werkverrigting.
Gemengde boerderye wat veelsydige trekkers hoog op prys stel, kan veral by Action Agri se rooi en blou werktuie baat vind.
“Ons bedien ’n groot gebied rondom Lichtenburg en Zeerust, waaronder Skuinsdrif, Mareetsane, Mahikeng en Groot-Marico,” sê mnr. Theuns Janse van Rensburg, handelaarshoof by Action Agri.
“Klante kan verseker wees van ons werkswinkel en onderdele-afdeling se ondersteuning. Ons besoek ook plase vir tegniese ondersteuning, onderhoud- en herstelwerk.”
Action Agri verkoop ook gebruikte trekkers en aanvaar enige trekkers in ’n goeie werkende toestand as inruilings.
“Ons versien of herstel ook enige fabrikaat. Ons werktuigkundiges en verkoopspersoneel het ’n wye kennis van al die verskillende trekkers op die mark,” sê Theuns.
NUWE REEKSE
“Argo se reekse McCormick-en Landini-trekkers staan saam met ander werktuie gereed vir bykans elke soort toepassing op jou plaas,” sê mnr. Izak Smit, streekbestuurder van Argo. “Of jy ’n trekker propvol moderne tegnologie in die kajuit verkies of ’n meer basiese, meganiese model – die keuse is joune.”
Wees op die uitkyk vir Landini se nuwe reekse medium- en laekilowatt-trekkers wat ook met nuwe name spog. Só is die Technofarm nou die Landini Multifarm-reeks (5061 kW), die Landini 60-reeks is nou die Landini Super 7865/8865-reeks (55-60 kW) en die Globalfarm-reeks heet nou die Landini Super 90/100/110-reeks (61-75 kW).
Die McCormick B-Max-reeks is ook aangepas en staan nou bekend as die McCormick B-Max 90 (61 kW), 100 (68 kW) en 110 (75 kW). Die ou McCormick MB-reeks is vervang deur die nuwe McCormick B-Max 75/85-reeks (55-60 kW).