BIO-PRODUKTE VAN FRANSE BIED SA MEER OPSIES
Roullier is die internasionale maatskappy wat die Suid-Afrikaanse kunsmis maatskappy Profert uit finansiële stormwater gaan red. Dié maatskappy kan die vee- en saaibedrywe in die Suid-Afrikaanse landboumark met talle opwindende nuwe misstowwe verruim via Profert se gevestigde agent-netwerk.
Die ooreenkomste vir die transaksie is reeds onderteken, maar goedkeuring van die Mededinging s kommissie is nodig voor die oorname afgehandel kan word.
Die Roullier-groep, met sy hoofkantoor in St. Malo aan die Engelse Kanaal op die noordwestelike kus van Frankryk, lê grootliks klem op mikrobiese gesondheid by plante, diere en grond.
Daniel Roullier, destyds nog ’n jong entrepreneur van St. Malo, in die Franse streek Bretagne, het die maatskappy in 1959 gestig nadat hy ’n stuk versteende koraal-alge op een van die stad se kaaie gekoop het.
Dié marine-neersetting, ook bekend as maerl, kom in die Middellandse See voor, langs die grootste deel van die Atlantiese kuslyn vanaf Portugal tot by Noorweë, asook in die Engelse Kanaal, Ierse en Noord-seë. Dit bevat onder meer heelwat kalsium en magnesium, en word al eeue lank ontgin.
Dit kom in die fotiese sone van die see voor waar genoeg sonlig nog deurdring om fotosintese toe te laat. Koolstofdatering het gewys party van dié beddings kan selfs ouer as 5 500 jaar wees.
Dan i else eerste voedingstof produk was verpoeierde maerl, wat hy as ’n grondopknapper bemark het. Later het hy fosfate bygevoeg. Dié is deur die maatskappy Timac verkoop, wat deesdae ’n lid van die Roullier-groep is en in Suid-Afrika ’n tak het.
WÊRELDWYD TEENWOORDIG
Sedertdien het die groep in ’n internasionale onderneming met duisende werknemers ontwikkel. Sy produkte word wêreldwyd in meer as 100 lande bemark. Amper 70% van sy spanne werk buite Frankryk.
Een van Roullier se vee rantsoen produkte is ’n lekblok wat gedroogde en verfynde seewier-ekstrak bevat. Dit is ’n natuurlike bron van kalsium, magnesium en spoorelemente. Dit kan voedingstof-opname verhoog deur die aktiwiteit van bakterieë in die rumen te bevorder.
Nog ’n veevoer-aanvuller bevat maerl, wat die pH in die rumen stabiliseer om ’n gunstiger omgewing vir bakterieë te skep en probleme met suurpens (asidose) beperk.
ORGANO-KUNSMIS
Aan die bemestingkant bemark Roullier ’n fosfaatproduk wat met humiensuur ’n kompleks vorm. Dié proses skep ’n organiese ring rondom elke molekuul, wat die superfosfaat binne-in teen binding met ander minerale elemente in die grond beskerm. Meer daarvan is dus vir opname deur plantwortels beskikbaar. Proewe in Brasilië deur Roullier se wetenskaplikes het gewys dié produk verhoog opbrengste met gemiddeld 12%.
Roullier se stikstofkunsmis bestaan ook uit organiese en minerale komponente. Ureum, kalsium, magnesium en swael word daarin gekombineer. Dit is glo veral geskik vir intensiewe stelsels met hoë produksiekoste, waar groter doeltreffendheid belangrik is.
Die swael en magnesium in die produk moedig beter proteïen vorm ingaan, wat chlorofil ontwikkeling insluit. Dit maak nie die grond suur nie en stel stikstof geleidelik vry.
In die maatskappy se NPK-kunsmis word sy D-Coder-tegnologie ingespan om loging, atmosferiese verliese of vaslegging in die grond te beperk. Dié tegnologie verseker dat voedingselemente net vrygestel word as die plante groei. Dit word ’n risosfeer-beheerde kunsmis genoem.