NUWE WAPENS TEEN BLOUTONG
Te midde van chroniese tekorte aan bloutongentstof in Suid-Afrika, het wetenskaplikes van die Universiteit van Kaapstad twee nuwe entstofkandidate teen dié virus ontwikkel.
Dr. Alta van Zyl, ’n viroloog, en haar span het twee nuwe proteïen liggaampies in tabakplante gekweek wat dalk as doeltreffende nuwe entstowwe teen bloutong benut kan word.
Die twee kandidate, Zera-VP2ep en ZeraVP2, het hulself al in proewe met muise bewys deurdat dit ’n immuunreaksie teen talle bloutong-serotipes by die knaagdiere veroorsaak het.
Van Zyl skryf in die artikel in die vaktydskrif
BMC Biotechnology dat bloutong die eerste keer in Suid-Afrika opgemerk is toe fynwolskape meer as 200 jaar gelede uit Europa hierheen ingevoer is.
Sedert 1998 is dit een van die mees wydverspreide veesiektes ter wêreld.
’n Aantal entstowwe is al teen die siekte ontwikkel. Dié wat kommersieel beskikbaar is, sluit ongeaktiveerde heelvirus-entstowwe in, asook entstowwe met lewende virusse wat onskadelik gestel is.
Die entstof wat Onderstepoort Biologiese Produkte (OBP) vir Suid-Afrikaanse boere vervaardig en wat plaaslik gebruik word, werk teen ’n mengsel van bloutong-serotipes. Dit veroorsaak egter talle newe-effekte, soos die ontwikkeling van ligte simptome, verlaagde melkproduksie en besmetting via die plasenta.
Dít het tot die ontwikkeling van nuwe entstof-kandidate aanleiding gegee, wat met die hulp van insek- en plantselle vervaardig kan word. Die nadeel van dié nuwe geslag entstowwe is egter dat hulle net teen een van die 27 bloutong sero tipes beskerming bied, tensy hulle saam met ander toegedien word, wat die entstof duur maak. Altesaam 22 van die 27 bloutong sero tipes wa taan die mens bekend is, kom seisoenaal in Suid-Afrika voor.
Die nuwe entstofkandidate hou juis belofte in omdat hulle ’n immuunreaksie teen verskeie serotipes van die siekte by die muise geaktiveer het. Hulle kan ook maklik en vinnig in plantselle vervaardig word.