MENG SELF VARKVOER

Ons het met varke begin boer en hul rantsoene bestaan uit gemaalde lusern, gemaalde mielies en rosyntjiereste. Wat moet ons nog by die rantsoene voeg vir die speenvarkies en ook vir die sôe wat nou kleintjies het?

Wees versigtig met neweprodukte of afvalprodukte van grondstowwe. Rosyntjiereste het ’n hoë vog- en suikerinhoud. Gevolglik kan die produk maklik muf. Muf vervaardig gifstowwe en dit is baie nadelig vir die klein varkies, asook die teeldiere. Die gifstowwe het ’n invloed op groei, reproduksie en veroorsaak ’n rits ander probleme wat ook tot vrektes kan lei.

’n Speenvarkie se spysvertering is gevoelig en gespesialiseerd. Daarom moet hulle hoogs verteerbare rantsoene van gehalte kry. Aangesien klein varkies vinnig groei en hul voeromsettingsverhouding so doeltreffend is, is dit lonend om in goeie rantsoene te belê ongeag wat dit kos. Lê dus eerder klem op gehalte.

As jy graag jou eie voer wil meng, is dit raadsaam om spesialiste te kontak wat vir jou die regte rantsoene kan saamstel en goeie raad kan gee. Dit is nie net belangrik om gebalanseerde rantsoene aan jou varke te voorsien nie, maar ook om die regte rantsoen in die regte produksiestadium aan die diere te gee. Elke fase van ’n vark se lewe het ’n spesiale rantsoen nodig, byvoorbeeld laktasie, dragtigheid, voor speentyd, met speentyd, groei en bemarking.

ASA-produkte in Johannesburg (tel. 01 1 683 7212) het spesiaal geformuleerde melkpoeiers, speenrantsoene en kos vir babavarkies (ook pasgebore varkies) beskikbaar. U kan ook by die groot veevoermaatskappye om raad vra. Hulle help graag.

Besoek die webwerf www.feedtek.co.za asuself voer wil meng. Tree in verbinding met die naaste agent of voedingkundige in u streek. Die Feedtekorganisasie het ook aangepaste oplossings vir boere wat rantsoene tuis wil meng.