WETTIGE WATERGEBRUIK

Ek het ’n artikel 35 (1)-brief van die Departement van Waterwese gekry. Wat staan my te doen?

Let eerstens op die keerdatum op die skrywe en reageer betyds of vra betyds om uitstel.

Voltooi die aansoekvorm aan die hand van stawende dokumente wat betrekking het op die betrokke tydperk (1996-1998-1999) (“die kwalifiserende periode”), byvoorbeeld permitte, waterhofbevele, ou Eskom-rekenings, lugfoto’s, pompdata, ensovoorts. Dit is dus enige dokument wat u as relevant beskou ten opsigte van u wettige watergebruik in die kwalifiserende tydperk. Onthou, die klem val op daardie watergebruik wat wettiglik in die kwalifiserende tydperk uitgeoefen is en nie dít wat as sulks geregistreer is nie.

Aanvaar dat die inligting wat op die kennisgewing verskyn, nie noodwendig korrek gaan wees nie. In die kennisgewing word onderskei tussen die huidige watergebruik (current period) en die kwalifiserende tydperk (qualifying period).

Hoewel satellietbeelde en lugfoto’s van waarde is om die omvang van die ontwikkeling op die grond aan te dui, is dit nie bepalend vir die volumetriese gebruik op die lande nie. Ander faktore, soos skeduleringsmetodes vir besproeiing, tipiese gewasse en betroubaarheid van die lewering van die bron, moet ook in ag geneem word. Dit is egter van groot belang dat u die foute aandui waarvan u bewus is.

Die vasstelling van die watergebruik (art. 35[4]) is die volgende stap in die verifikasieproses. Dit is dus noodsaaklik dat u die eerste deel van die proses met groot omsigtigheid benader.